Къалэу Мыекъуапэ ичIыпIэхэу анахь Iужъоу цIыфхэр зыщыпсэухэрэм бэ­дзэогъум и 17-м мафэм сыхьатыр 3-м электроэнергиер ащыпаупкIы­гъагъ. Черемушкэр, ЧеремышкакIэр, къалэм икъохьэпIэ лъэныкъо ыкIи чъыгхатэхэм ащыщыбэ ащ къыхиубытагъэх. Социальнэ хъытыухэмкIэ цIыфхэр тхьаусыхэщтыгъэх светыр зыкIыщымыIэм ылъапсэ икъоу амышIэу, пIалъэу ащ ыкъудыищтыр зыфэдизым ыгъапэхэу.

Бэдзэогъум и 18-м Мыекъуапэ ипащэ Iофхэм язытет щигъэгъозагъэх, электричествэм нахь фэсакъынхэу, щэIагъэ къызхагъэфэнэу къяджагъ. Мы Iофым фэгъэзэгъэ къулыкъухэм зэралъытэрэмкIэ, кондиционерхэр, гъэучъыIэлъэ зэфэшъхьафхэр бэу зэдагъэфедэхэ зэрэхъугъэм къыхэкIэу энергием икъэ­кIуапIэхэр зэщэкъох.
— Къэбарэу къытIэкIахьэрэр зэкIэ энергетикхэм алъытэгъэIэсыжьы. КъызгурэIо Iофхэм язытет зыфэдэ хъугъэр, ау къэлэдэсхэм сялъэIу щэIагъэ къызхагъэфэнэу, — къыIуагъ Геннадий Митрофановым.
ПIэлъэ гъэнэфагъэкIэ электроэнер­гиер къатызэ ашIыщт
Адыгеим икъэлэ шъхьаIэ щызэхашIэ электричествэр икъоу зэрэщымыIэр. Ащ къыхэкIэу пIэлъэ гъэнэфагъэкIэ паупкIызэ зэрашIыщтым изэкIэлъыкIуакIэ зэрэзэхагъэуцощтымкIэ къалэм ихэбзэ къулыкъухэм макъэ къагъэIугъ. Уахътэу светыр зэрэщымыIэщтымрэ чIыпIэу зыIэкIэмыхьащтымрэ джырэкIэ къаIуагъэгоп. Зыщыгъозэхэ закъор мы лъэхъа­ным Мыекъуапэ икъохьэпIэ лъэныкъо икъоу электричествэр зэрэIэкIэмыхьэрэр ары.
Мэрием къызэрэщаIуагъэмкIэ, электрическэ хъытыухэм атегъэкIагъэм къыкIегъэчыгъэным пае арэущтэу электроэнергием икъэтын зэпагъэузэ зыкIашIыщтыр.
— НепэкIэ электричествэ рыкIуапIэхэм атегъэкIагъэр зэрэбэм къыкIичыгъэп. Ащ къыхэкIэу пIэлъэ гъэнэфагъэкIэ электроэнергиер кIэугъоегъэным иамал агъэфедэнкIи хъущт. Аварие инхэр къэ­мыхъунхэр ары анахь пшъэрылъ шъхьа­Iэу къэуцугъэр, — къыхигъэщыгъ Мыекъуапэ ипащэу Геннадий Митрофановым.
Ащ къызэриIуагъэмкIэ, энергетикхэр лъэплъэх къалэм ичIыпIэ зэфэшъхьафхэм электроэнергиер зэраIэкIахьэрэм.