Олимпийскэ резервым испортивнэ еджапIэ зыщызыгъэсэхэрэ спортсменхэр Урысыем икIэлэеджакIохэм яя XII-рэ Гъэмэфэ Спартакиадэм хэлэжьагъэх ыкIи тыжьынрэ джэрзрэ Адыгэ Респуб­ликэм къыфахьыгъ.

Краснодар дэт спортивнэ комплексэу «Баскет Холл» зыцIэм иалырэгъухэр ары медальхэм защыфэбэнагъэхэр. Илъэс 14 - 16 зыныбжь спортсменхэу ящэнэрэ спортивнэ разрядым нахь мымакIэ зиIэхэр Урысыем ишъолъыр 56-мэ къарыкIыгъэх.
КIалэхэмрэ пшъашъэхэмрэ къащэчырэм елъытыгъэу купибгъумэ ащыбэнагъэх, ахэр медальхэм зэрафэбанэхэрэм фэшъхьафэу шъо­лъырэу къыздикIыгъэхэми пчъагъэхэр къафахьыгъ. Цэй Алый килограмм 53-рэ къэзыщэчырэ купым щыбэнагъ ыкIи ятIонэрэ чIыпIэр къыдихыгъ, ар тренерхэу Джармэкъо Р. Н. ыкIи Джармэкъо А. Н. агъасэ. Алыбэрд Муслъим киллограмм 46-рэ къэзыщэчырэмэ ябэныгъ ыкIи ящэнэрэ хъугъэ, итренерыр ГуIэтыжь Х.А.
КомандэхэмкIэ пштэмэ, Москва икомандэ апэрэ чIыпIэр къыдихыгъ, Краснодар краир ятIонэрэ, Новосибирскэ хэкур ящэнэрэ чIыпIэхэм уцугъэх.