Сабыибэ зэрыс унагъохэм ыкIи зигъот макIэхэм яфэныкъуагъэхэр дэгъэзыжьыгъэнхэмкIэ социальнэ IэпыIэгъоу республикэм аригъэгъо­тырэм хигъэхъощт. АР-м иминистрэхэм я Кабинет изичэзыу зэхэсы­гъохэм ащыщ ащ щытегущыIагъэх.

Ахэм ащыщэу охътэ бла­гъэхэм гъэцэкIагъэ хъущтхэм ащыщ «Пункт проката» зыфиIорэр. Мы фэIо-фашIэр сабый зиIэу, зигъот мэкIэ унагъохэм атегъэпсыхьагъ. АР-м и ЛIы­шъхьэу КъумпIыл Мурат иунашъокIэ ар гъэцэкIагъэ хъущт. ЗэшIокI зимыIэ унагъохэм сабыйхэм япIункIэ апэрэ щыкIагъэхэр агъотынымкIэ ар амалышIущт. КIэлэцIыкIум ищыкIэгъэ псэуалъэхэр зымыщэфы­шъущтхэм «Пункт проката» зыфиIорэм зыфагъэзэнышъ, сабыир илъэсищ ныбжьым нэсыфэ ищыкIэгъэщтыр ыпкIэ хэмылъэу къыIахын алъэкIыщт.
«Ахэр къэхъугъакIэм (мэзи 7 зыныбжьым), нахь такъыр хъугъэм апае курэжъыехэр, сабый гъолъыпIэр, зыщышхэщт пхъэнтIэкIу-Iэнэ зэхэтыр, къэ­хъугъакIэр зыщызэблэпхъущт Iанэр, кIоным илъэхъан IэпыIэгъу къыфэхъущт пкъыгъор, автомобилым ибгъэуцорэ гъо­лъыпIэ-тIысыпIэхэр. А пстэумэ язэгъэгъотынкIэ республикэ бюджетым сомэ миллионрэ мин 200-м ехъу къетIупщы», — къэ­барым тыщигъэгъозагъ АР-м IофшIэнымкIэ ыкIи социальнэ хэгъоныгъэмкIэ и Министерствэ иIофышIэу Саида Стрикачевам.
«Пункт проката» зыфиIорэр Адыгеим ичIыпIитIумэ къащызэIуахыщт: цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэхэу Мые­къуапэрэ Тэхъутэмыкъуаерэ ащы­лажьэхэрэм.
Мыекъуапэ и Зэхэубытэгъэ гупчэ ипащэу Артур Казиновым къызэриIуагъэмкIэ, джырэкIэ гъэхьазырын IофшIэнхэм ахэтых. Псэуалъэхэр ащэфынхэр ямурад.
«СызэрэгугъэрэмкIэ, унагъо­хэм апае дгъэпсыщтыри игъо дэд. Непэ зэкIэри лъапIэ. Сабыим ищыкIагъэхэр ыпкIэ хэмылъэу унагъохэм агъотышъу хъумэ, ящыIэныгъэ къызэри­гъэпсынкIэщтым сицыхьэ телъ. Сэкъатныгъэ зиIэхэмкIэ щы­Iэныгъэр Iэрыфэгъуным фэшI техническэ Iэмэ-псымэхэм ятынкIэ «Пункт проката» зыфиIоу тиIэмкIэ ар тыушэтыгъах. Ащ лъэшэу ишIогъэшхо къэкIо, бэ къытэуалIэрэр ыкIи ашIоIэрыфэгъу», — еIо Кази­новым.
Сэкъатныгъэ зиIэхэм, нэжъ-Iужъ пIэхэлъхэм ашъхьэ аIы­гъыжьынымкIэ ыкIи икъоу къадекIокIышъунхэмкIэ ищыкIэгъэ техническэ Iэмэ-псымэхэр зыщатэу «Пункт проката» зыфиIорэр цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Мыекъуапэ дэтым зыщылажьэрэр илъэс зытIущ хъугъэ. Непэ, щыIэныгъэр лъапIэ зыщыхъугъэ лъэхъаным, ипсауныгъэ изэтегъэуцожьынкIэ зыфэныкъор зымыщэфышъущтымкIэ мыщ фэдэ фэIо-фашIэр хэкIыжьыпIэшIу. Сыма­джэм ищыкIагъэмкIэ мы пуктым зэзэгъыныгъэ да­шIышъ, илъэс пIалъэ иIэу ыгъэфедэнэу раты. ИщыкIагъэмэ, ыуж зэзэгъы­ныгъэр лъагъэкIуатэ.

«ЛъэныкъуитIукIэ Iоф тэшIэ. Апэрэм хахьэхэрэр пIэлъэ кIыхьэ иIэу техническэ Iэмэ-псымэхэр ыпкIэ хэмылъэу зэттыхэрэр. Ахэр ти Гупчэ щытхы­гъэхэу, тифэIо-фашIэхэр зэдгъэгъотхэрэр ары. Ащ къыхиубытэхэрэр зыныбжь илъэс 18 хъугъэхэмрэ ыкIи нахьыжъхэмрэ. Ахэм апае Iэмэ-псымэхэм язэгъэгъо­тын федеральнэ мылъкоу сомэ миллионищрэ мин 800-рэ фэдизыр пэIухьагъ. ЯтIонэрэм шIоигъоныгъэ зиIэхэр зэкIэ къыхеубы­тэх, ау ахэм ыпкIэ аты. Ары нахь мышIэми, ари къэпщэфыным нахьи нахь пыутэу къекIы. Мэзих-­илъэс нахь умыгъэфедэщтмэ, сыда къызкIэпщэфыщтыр? ТиIофшIэни ар къегъэшъыпкъэжьы, зы­къытфэзыгъазэрэр бэ», — къытфиIотагъ цIыфхэм ясоциальнэ фэIо-фашIэ­хэр зыгъэцэ­кIэрэ Зэхэубытэгъэ гупчэу Мыекъуа­пэ дэтым ипащэ игуа­дзэу Елена Бирю­ковам.
Непэ гупчэм пIэкIорхэр, ошэкурхэр, курэжъыехэр, къэбзэныгъэм пае пкъыгъо зэфэшъхьафхэр ыкIи нэмыкIыбэ иIэх. Мыщ фэ­дэ IэпыIэгъур бэмышIэу къызфигъэфедагъ пIэхэлъ хъугъэ лIыжъым лъыплъэ­рэ Татьянэ. Лъэкъоуз зиIэ хъулъфыгъэм ар лъэплъэ. Килограммишъэ къэзыщэ­чырэр къэпIэтыныр хэгъэ­кIи, бгъэкощыныр хьылъэ. «Пункт проката» зэрэла­жьэрэр зешIэм, игуапэу зыфигъэзагъ ыкIи зыкIэмыIэжьырэ лIыжъыр зэ­ри­гъэпскIын ылъэкIыщт пкъыгъор илъэс пIалъэ иIэу къаIихыгъ.
«Шъыпкъэр пIощтмэ, ишIогъэ дэдэ къысэкIыгъ. Джы къин пымылъэу сыкъыздекIокIырэ сымаджэр сэгъэпскIы. ПIэтехъом фэ­дэу зэрэщылъэу кIэсэбзэшъ, ар сэгъэпщы, а чIыпIэ дэдэм сыщыпэтхьэкIыхьэ. ИIухыжьыни Iэрыфэгъу: ичъыжьыпIэ иIэу псыр щалъэм къелъа­дэшъ, исэкIутыжьы. Сы­ма­джэм икIухьэ-кIыхьэ ибгъэ­къумэ, узыми нахь текIо, игуапи мэхъу. «Ащ фэдэу зызысымыгъэпс­кIы­гъэр бэшIагъэ» ыIозэ, лъэ­шэу гушIуагъэ», — къыд­­дэгощагъ бзылъфыгъэр.
Арышъ, джы унагъохэм апае агъэпсыщтми бэкIэ щэгугъых. АР-м IофшIэнымкIэ ыкIи социальнэ хэхъоныгъэмкIэ и Министерствэ къызэритырэмкIэ, зигъот мэкIэ унагъо­хэм апае «Пункт проката» зыфиIорэ апэрэ чIыпIэхэм якъызэIухын шышъхьэIум аублэщт. НепэкIэ Мые­къуапэрэ Тэхъутэмы­къуаерэ пилотнэ проектых. Арышъ, ишIуагъэ къызы­лъагъокIэ, респуб­ликэм ирайонхэми аща­гъэпсынхэ алъэкIыщт. Джащ фэд, комиссионэ тучанхэм якъы­зэIухыни рахъухьа­гъэхэм ащыщ. Ны-тыхэм сабыйхэм апае ащ осэ мыинкIэ щыгъынхэр щагъотыщтых.
Анцокъо Ирин.