Республикэм ичIы­гулэжьхэм мыгъэ Iуахыжьынэу пстэумкIи бжыхьэсэ гектар мини 109-м ехъу апхъы­гъагъ. Ащ щыщэу мин 90-м ехъур коцым ра­гъэубытыгъагъ, бжы­хьэсэ хьэр гек­тар мини 8,2-рэ хъущтыгъ.

Бжыхьэсэ лэжьыгъэм иIу­хыжьын тичIыгулэжьхэм аухыгъ. АР-м мэкъумэщымкIэ и Министерствэ къы­зэритыгъэмкIэ, гурытымкIэ лъытагъэу, зы гектарым центнер 49,9-рэ къырахызэ, коцэу ыкIи хьэу тонн
мин 496-рэ къаугъоижьыгъ, рапсыр тонн мин 17,7-рэ мэхъу.
БлэкIыгъэ илъэсым къаугъоижьыгъагъэм нахьи тонн мин 60 фэдизкIэ нахьыб мыгъэ лэжьыгъэу къыра­хы­жьыгъэр. ХэушъхьафыкIы­гъэу коцым игугъу пшIын зыхъукIэ, ащ изы гектар, гурытымкIэ лъытагъэу, центнер 50 къытыгъ, хьэм 49,1-рэ къырахыгъ.
Министерствэм къызэ­рэщыхагъэщыгъэмкIэ, ом изытет ыпкъ къикIэу, бжы­хьэсэ лэжьыгъэм иIожьын мыгъэ мэфипшI фэдизкIэ нахь пасэу фежьагъэх. Ощх зэрэщымыIагъэм фэшI Iоф­шIэнхэр псынкIэу лъыкIо­тагъэх ыкIи охътэ кIэкIым аIожьыгъ. Зы мафэм, гу­рытымкIэ, гектар мини 6 — 7 фэдиз Iуахыжьыщтыгъ. ПстэумкIи техникэ зэфэшъхьафэу 350-рэ Адыгеим игубгъохэм арытыгъ.
Мы мафэхэм мэкъумэщ хъызмэтшIапIэхэм етIупщыгъэу былымIусхэр агъэхьазырых, лэжьыгъэр къызэрахыжьыгъэ хьасэхэр къыкIэлъыкIорэ еутыгъом фы­тырагъэпсыхьэх.