Унагъом и Илъэс къыдыхэлъытагъэу ащ имэхьанэ къизыгъэлъэгъукIырэ арт-­объектхэр гурыт еджапIэхэм ащы­шIыгъэныр мысатыушI организациеу «Талантида» зыфиIорэрм лъегъэ­кIуатэ.

Мызыгъэгум проектыр зыщыгъэцэкIагъэ хъугъэр Мыекъуапэ игурыт еджапIэу N 6-р ары. Сурэтхэр лъэпкъ шъуашэм илъэу шIыгъэх, адыгэ унагъор къыщыгъэлъэгъуагъ.
«Лъэпкъым Хэгъэгум, культурэм шIулъэгъоу афы­риIэр мы сурэтхэмкIэ къидгъэлъэгъукIы тшIои­гъуагъ. Ар лIэужхэм зэIэпахызэ, жэрыIокIэ ны-тыхэм кIэлэцIыкIухэм аIуалъхьэзэ ыкIи ахалъхьэзэ илъэсишъэ пчъа­гъэхэм къырэкIох, мэпсэух. Ар анэгу кIэтыныр, блэкIхэмэ, агу къыгъэ­кIыныр, ащимыгъэгъупшэныр сурэтым ипшъэрылъ шъхьаI», — къыхегъэщы проектыр зигукъэкIэу, мысатыушI организа­циеу «Талантидэм» ипащэу Карен Каракьян.
Арт-объектыр еджапIэм иятIонэрэ къат идэпкъ щагъэпсыгъ. ДжырэкIэ зыгъэпсэфыгъом щыIэ кIэлэеджакIохэм илъэсыкIэ еджэгъур зырагъэ­жьэжькIэ, ар шIухьафтын афэхъущт.
«Сурэтэу дэпкъым тырашIыхьан алъэкIыщтхэр къызытагъэлъэгъум, мыр къыхэтхыгъ. Адыгэ лъэпкъ нэшанэ зыхэлъ сурэтыр щытлъэгъунэу тыфэягъ. Зэ­рэхъугъэр лъэшэу тыгу рехьы. Дэпкъым джыри чIыпIэ нэкI бэу иI. Арышъ, ащ фэдэ сурэтхэм яшIын лъыдгъэкIотэн тлъэкIыщт», — къыддэгощагъ Мыекъуапэ игурыт еджапIэу N 6-м ипащэ пIуныгъэ IофхэмкIэ игуадзэу Дзыбэ Светланэ.
Шъугу къэдгъэкIыжьын, «Движение первых» зыфиIорэм иIэпыIэгъукIэ про­ектыр гъэцэкIагъэ мэхъу. Ащ зэхищэгъэ зэ­нэкъокъум арт-объектхэм яшIынкIэ проектыр хэлэ­жьагъ ыкIи текIоныгъэр къыщыдихыгъ. Сурэтхэм яшIын сурэтышIхэмрэ во­лонтерхэмрэ хэлажьэх.
ПстэумкIи арт-объекти 9 Iофтхьабзэм къыдыхэлъытагъ. Зэрэрахъухьагъэм­­кIэ, республикэм икъа­лэ­хэм ыкIи ирайонхэм ягурыт еджэпIэ зырыз ащ къызэлъиубытыщт. Мые­къуапэ ия 6-рэ гурыт еджа­пIэ къыщызэIуахы­гъэр я 3-р. Ащ ыпэрэхэр къуаджэу Тэхъутэмыкъуае­рэ Абдзэхэхьаблэрэ ягурыт еджапIэхэм ащагъэ­псыгъэх. Зичэзыу арт-объ­ектыр зыщашIыщтыр джыри нафэгоп. ЕджапIэ­хэр сурэтхэм якъыхэхын ыуж итых.
Анцокъо Ирин.