Адыгеим щыпсэухэ­рэр IэпыIэгъу псын­кIэм иномерэу 122-м теохэмэ, шъэфэу психологическэ Iэпы­Iэгъу къаратын алъэкIыщт.

А номерым зытеохэкIэ араIон фае Адыгэ респуб­ликэ клиническэ психоневрологическэ диспан­се­рым «ицыхьэшIэгъу телефон» ра­пхы­нэу. Нахьыпэм фэдэу но­­мерхэр къэ­нэжьых: +7(800)200-01-22 (ыпкIэ хэмылъэу), +7(8772)56-86-04.
Чэщи мафи зэпытэу, ыпкIэ хэмылъэу медик психологхэм IэпыIэгъу къаратын алъэкIыщт. ­Адыгэ республикэ клиническэ психоневрологи­ческэ диспансерым къызэрэщаIуагъэмкIэ, къулыкъум пшъэрылъ шъхьаIэу иIэр ныбжь зиIэхэу ыкIи кIэлэцIыкIухэу чIыпIэ зэ­жъу ифагъэхэм псынкIэу IэпыIэгъу ятыгъэныр ары. Лъэшэу гумэкIхэу, гукъэнэ ин зиIэхэм, ны-тыхэмрэ кIэлэцIыкIухэмрэ язэгу­рымыIоныгъэ къыхэкIыгъэ гумэкIыгъохэр къызфы­къокIыгъэхэм, къыпэблэгъэ цIыфыр дунаим зэре­хыжьыгъэм апае лъэ­шэу зыгу цIыкIу хъугъэхэм мы къулыкъум иIофышIэхэр адэлажьэх.
2012-рэ илъэсым шы­шъхьэIум къыщегъэжьа­гъэу «цыхьэшIэгъу телефонэу» Iоф зышIэрэм лъэшэу ынаIэ зытыригъэт­хэрэм ащыщ кIэлэеджа­кIохэу аIэ зытыращэе­жьыным игупшысэ зы­шъхьэ къихьагъэхэм чанэу Iоф адэшIэгъэныр. 2016-рэ илъэсым къыщегъэжьа­гъэу илъэс къэс психологхэм Iофтхьэбзэ гъэнэфагъэхэр зэрахьэх, кIэлэцIыкIухэм нахь гурыIогъошIу зэра­фэхъущтым тетэу яеплъы­кIэ зэблахъуным тегъэ­псыхьэгъэ IэпыIэгъу араты. Джащ тетэу кIэлэегъа­джэхэм е ны-тыхэм кIэлэ­цIыкIухэм аIэ зытыращэе­жьынымкIэ гуцафэ горэ зафашIыкIэ, зэрэзекIон фае­хэм зэдэгущыIэгъухэр адашIых.