МэфэкIышхор къэблагъэ
Бэдзэогъум и 21-м Адыгэ республикэ ипподромэу Мыекъуапэ дэтым шы-спортивнэ мафэу «Адыгэ Республикэм ишIухьафтын инэу Дерби» зыфиIорэр щыкIощт.
Программэм тетэу, шыхэм гъогуони 7 къачъыщт, инджылыз шы лъэпкъ къабзэхэр ахэм ахэлэжьэщтых. Зэнэкъокъумэ афэшъхьафэу мэфэкIым Адыгэ Республикэм итворческэ купмэ зыкъыщашIыщт.
КIэлэцIыкIухэм апае хэушъхьафыкIыгъэ программэ мэфэкIхэм ястудие къыгъэхьазырыгъ, ахэм анимационнэ къэгъэлъэгъон ин къяжэ: зэлъашIэрэ мультфильмхэм ахэт персонажхэм языкъэшIын, эстафетэхэр, джэгукIэхэр, мастер-классхэр, къэшъокIо флешмобхэр ыкIи сабын псыбыбхэр.
Гъомылапхъэхэр зыщащэщт чIыпIэхэр щыIэщтых. Шыгъэчъэ мафэр пчэдыжьым сыхьатыр пшIым ыныкъом рагъэжьэщт, шыхэр сыхьатыр 10-м ечъэжьэщтых.
Адыгэ Республикэм физическэ культурэмрэ спортымрэкIэ и Комитетрэ шыхэр зыIыгъхэмрэ я Ассоциациерэ Iофтхьабзэм кIэщакIо фэхъугъэх.