Кавказ инвестиционнэ форумым илъэхъан зэзэгъыныгъэ заулэмэ акIэтхагъэх, респуб­ликэм иэкономикэкIэ анахь мэхьанэ зиIэ лъэныкъуитIур — зекIонымрэ промыш­лен­ностымрэ ахэм ащыщых.

ГущыIэм пае, АР-м и ЛIы­шъхьэу КъумпIыл Муратрэ пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» игъэцэ­кIэкIо пащэу Сергей Погодинымрэ Адыгэ Республикэмрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «СФТ Групп» зыфи­Iорэмрэ гухэлъэу яIэхэм афэгъэхьыгъэ Зэзэгъыныгъэми аIа­пэ кIадзэжьыгъ. Ар зыфэ­гъэхьыгъэр гофрэм икъыдэгъэ­кIын фэгъэзэгъэщт заводыкIэу «Картонтара 2» зыфиIорэм ишIын къыдилъытэрэ лъэны­къохэр ары. Илъэсым квадрат метрэ миллиони 110-м къыщегъэжьагъэу миллиони 130-м нэс ащ къыдигъэкIын ылъэкIыщт. Мыекъуапэ дэт предприятиеу ыпшъэкIэ зигугъу къэтшIыгъэ обществэм ием ар къыгуагъэуцощт ыкIи гектари 10,3-рэ фэ­диз ыубытыщт. Инвестициехэр сомэ миллиарди 2,8-м нэсыщтых. 2024-рэ илъэсым ыкIэхэм адэжь ащ Iоф ышIэу ригъэ­жьэнэу мэгугъэх. IофшIэпIэ чIыпIи 134-м ехъу ащ щызэ­хащэщт.
Ащ нэмыкIэу пшъэдэкIыжьэу ыхьырэмкIэ гъунэпкъэ гъэнэфа­гъэ зиIэ обществэу «Красный мост» зыфиIорэм къыдилъытэрэ зэзэгъыныгъэхэм атетэу инвестиционнэ проектитIу рес­публикэм щызэшIуахыщт. Адыге­им зекIоным зыщегъэушъомбгъугъэнымкIэ тIуми яшIуагъэ къэкIощт: зекIоным епхыгъэ псэуалъэм ишIынрэ бальнео­логическэ комплексыр зыпкъ игъэуцожьыгъэнымрэ зигугъу тшIыхэрэр.
Проектхэм затегущыIэхэ нэ­ужым Адыгэ Республикэм и ЛIышъхьэу КъумпIыл Муратрэ обществэу «Красный мост» зыфиIорэм илIыкIоу Анна Гавриловамрэ сомэ миллион 780-рэ фэдиз зыпэIухьащт инвестиционнэ проектым игъэцэкIэн епхыгъэ зэзэгъыныгъэм кIэтхагъэх. ЗыгъэпсэфыпIэ комп­лек­сэу «RED BRIDGE RESORT» зы­фиIоу номери 120-рэ зыхэтыщтым а мылъкур пэIуагъэ­хьащт. Номерхэр жъогъуиплI хъущтых, ресторан, кIэлэцIыкIу унэхэр, зэкIэми зэдагъэфедэным фытегъэпсыхьэгъэ шъхьэ­ихыгъэ бассейнэхэу чIычIэгъым къычIэкIырэ Iэзэгъупсыр зэрытыщтхэр ыкIи нэмыкIхэр хэтыщтых. Ащи IофшIэпIэ чIыпIэ 90-м ехъу щызэхащэщт. Псэуалъэр Мыекъопэ районым, псыхъоу Шъхьэгуащэ инэпкъ къытетэ­джэщт. ДжырэкIэ агъэфедэрэ комплексэу «RED BRIDGE» зы­фиIорэм амалэу иIэхэм ащ нахь заригъэушъомбгъущт.
Ахэм анэмыкIэу къэIогъэн фае 2024-рэ илъэсым ресторанэу «Пхали-Хинкали» зыфиIорэр ащ къызэрэгуашIыхьагъэр. Джы гъэпсэфыпIэм епхыгъэу ар хъущт.

Обществэу «Красный мостым» дашIыгъэ зэзэгъыныгъэхэм зыкIэ ащыщ Мые­къопэ чIычIэгъ Iэзэгъупсым ибальнеологическэ отделение зыпкъ игъэуцо­жьыгъэныр. Инвесторым гухэлъэу иIэ-
хэм зыкIэ ащыщ бальнеологиемрэ реа­билитациемрэкIэ гупчэу «ТЕТИС» зыфиIорэр ыгъэуцуныр. Номер 26-рэ зы­хэтыщт хьакIэщри ащ къыгуишIыхьащт. IофшIэпIэ чIыпIэ 49-рэ фэдиз ащ къытыщт. Инвестициехэр сомэ миллион 300 фэдиз хъущтых.
«ЗекIоныр IофшIэнэу зэшIотхыщтым истратегическэ лъэныкъохэм зыкIэ ащыщ. ГъэпсэфыпIэшхоу «Лэгъонакъэ» ишIын етэпхых зэхъокIыныгъэ инхэу ащ фэхъущтхэри. ЗекIоным епхыгъэ фэIо-фашIэхэр нахьышIоу зэхэщэгъэнхэм тыдэлажьэ. Ахэм зыкIэ ащыщых хьа­кIэхэм япсауныгъэ зыпкъ зыщырагъэуцожьыщт чIычIэгъ Iэзэгъупсхэр зыща­гъэфедэщтхэ чIыпIэхэри. Мы аужырэ лъэхъаным цIыфхэм нахь игъэкIотыгъэу къызфагъэфедэхэрэм ащыщых чIычIэгъым къычIэкIырэ псы фабэхэр. ПроектыкIэхэм язэшIохын ишIогъэшхо къэ­кIощт джырэ лъэхъаным диштэрэ амалхэр зызгъэпсэфхэрэм, зекIо къэкIуагъэхэм ягъэгъотыгъэнхэмкIэ ыкIи ахэр нахьышIоу зэхэщэгъэнхэмкIэ», — къыхигъэщыгъ КъумпIыл Мурат.
Адыгеим и ЛIышъхьэ къызэриIуа­гъэмкIэ, республикэм тапэкIи хэхъоныгъэу ышIыщтыр анахь мэхьэнэ ин зэттырэ промышленностымрэ зекIонымрэ япхыгъэу щыт. Инвестиционнэ зэзэгъы­ныгъэу зыкIэтхагъэхэм ахэм яхэхъо­ныгъэ яIахьышхо зэрахашIыхьащтым ицыхьэ зэрэтелъыр КъумпIыл Мурат къыхигъэщыгъ.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.