Адыгэ Республикэм «инициативное бюджетирование» зыфиIорэ программэм зыщыра­гъэу­шъомбгъуным иIофыгъохэм афэгъэхьыгъэ дэкIыгъо зэхэсыгъо Шэу­джэн районымкIэ къуа­джэу Хьакуры­нэхьаблэ щыкIуагъ.

Iофтхьабзэм хэлэжьагъ АР-м иминистрэхэм я Кабинет и Тхьа­матэ игуадзэу, финансхэмкIэ министрэу Виктор Орловыр. Джащ фэдэу зэхэсыгъом къекIолIагъэх къоджэ псэу­пIэ­хэм, чIыпIэ зыгъэIорышIэжьыпIэхэм ялIыкIохэр.
Муниципальнэ образованиеу «Шэуджэн районым» ипащэу Аулъэ Рэщыдэ Iофтхьабзэм хэлажьэхэрэм шIуфэс гущыIэ­хэмкIэ закъыфигъэзагъ.
— Сигуапэ тэ тирайон мыщ фэдэ дэкIыгъо зэхэсыгъо зэ­рэщызэхэшъущагъэр. НепэкIэ мэ­хьанэ зиIэ проектым респуб­ликэм зыщиушъомбгъунымкIэ ащ ишIуагъэ къэкIонэу тыщэ­гугъы. Инициативнэ бюджетированием изы Iахь шъхьаIэхэм ащыщ общественнэ чIыпIэхэм язэтегъэпсыхьан, гъогу­хэм яшIын, нэмыкIхэми цIыфхэр къахэгъэлэжьэгъэнхэр. Сыд фэдэрэ зэхъокIыныгъэшIоу рес­публикэм щыхъухэрэм цIыфхэр нахьыбэу къахэдгъэлэжьэнхэм АР-м и ЛIышъхьэу КъумпIыл Мурат тынаIэ тырытегъадзэ, — хигъэунэфыкIыгъ Аулъэ Рэщыдэ.
Министрэу Виктор Орловым къызэриIуагъэмкIэ, 2017-рэ илъэсым къыщегъэжьагъэу проектэу «Инициативное бюджетирование» зыфиIорэм Адыгеир хэлажьэ ыкIи Къыблэ феде­ральнэ шъолъырымкIэ апэу ар пхырызыщыгъэ субъектэу щыт.
— Илъэси 6-м къыкIоцI Адыге­им икъэлэ ыкIи икъоджэ псэупIэ 25-мэ проект 70-рэ щапхыращыгъ. Ахэм пстэумкIи сомэ миллиони 112-рэ апэIу­хьагъ, ащ щыщэу сомэ миллион 72-р республикэ бюджетым къикIыгъ. Мы илъэсым заявкэ 50-мэ ахэплъагъэх, ахэм апэ­Iухьанэу тишъолъыр бюджет сомэ миллион 50 къыщыда­лъытагъ. Апэ а мылъкур сомэ миллион 30 хъущтыгъэ, ау заявкэу къатыгъэхэм ялъытыгъэу Адыгеим и ЛIышъхьэ ахэр пхы­рыщыгъэнхэ ыкIи ахъщэ тедзэ хагъэхъожьын фаеу ылъы­тагъ. Ащ тетэу сомэ миллион 20-м ехъу проектхэм япхырыщын хагъэхъожьыгъ, — хигъэу­нэфыкIыгъ Виктор Орловым.
Джащ фэдэу, финансхэмкIэ министрэм къызэриIуагъэмкIэ, мы илъэсым зэнэкъокъу шIыкIэм тетэу къыхахыгъэ псэупIэ 22-мэ зэзэгъыныгъэхэм адыкIэтхагъэх ыкIи проект 30-мэ апэIухьащт субсидиехэр аратыгъэх. ГухэкI нахь мышIэми, Шэуджэн районыр инициативнэ бюджетированиемкIэ программэм зэ ныIэп зэрэхэлэжьагъэр. Арышъ, мы зэхэсыгъом щысэу къыщагъэлъэгъощтхэм тапэкIэ акIырыплъынхэм ишIуагъэ къэкIонэу мэгугъэх.
«Инициативное бюджетирование» зыфиIорэ шъолъыр программэм чанэу хэлажьэхэ­рэм ащыщ Дондуковскэ къоджэ псэупIэр. Ащ ипащэу Николай Бровиным къызэриIуагъэмкIэ, илъэс зэкIэлъыкIохэм мыщ ишIуагъэкIэ сомэ миллиони 10-м ехъу зыосэ проекти 5 щагъэцэкIэн алъэкIыгъ. Мыщ фэдэ псэупIэ мыиным итеплъэ зэтегъэпсыхьагъэ хъунымкIэ ар мылъку макIэп.
— 2018-рэ илъэсым Кировым ыцIэ зыхьырэ скверым культурнэ Iофтхьабзэхэр зыщызэхэт­щэщтхэ гъэIагъэ щытшIыгъ. Ащ нэмыкIэу кIэлэцIыкIу IыгъыпIэу «Теремок» зыфиIорэм екIурэ лъэсгъогоу метрэ 600 хъурэр дгъэцэкIэжьыгъэ. Станицэм щыщ­хэу Хэгъэгу зэошхом хэкIо­дэгъэ дзэкIолIхэм яшIэжь зыща­гъэпытэгъэ мыжъосыныр, нэмыкI зэо зэфэшъхьафхэм ахэлэжьагъэхэм яшIэжь фэгъэхьыгъэ тамыгъэхэр ащыдгъэуцугъэх, — къыIуагъ Николай Бровиным.
Джащ фэдэу программэм ишIуагъэкIэ Дондуковскэм дэт скверым спорт площадкэ ща­гъэпсын алъэкIыгъ. Мы илъэсым къоджэ еджапIэм екIурэ лъэс­гъогоу метрэ 600 хъурэри зэтырагъэпсыхьагъ.
ДэкIыгъо зэхэсыгъом Блащэ­псынэ, Кощхьэблэ къоджэ псэу­пIэхэм, Инэм къэлэ псэупIэм япащэхэр инициативнэ бюджетированиемкIэ проектыр зэращыпхыращырэм къытегущыIа­гъэх. Iофтхьабзэм хэлэжьагъэ­хэр яшIэныгъэхэмкIэ зэхъожьыгъэх.
Шъугу къэдгъэкIыжьын «Инициативное бюджетирование» зыфиIорэ проектыр зытегъэпсы­хьагъэр: псэупIэм щагъэцэкIэ­жьыщт объектыр цIыфхэм къыхахы, ащ пэIухьащт мылъкум изы Iахь лъэкI зиIэ цIыфхэм къаугъои, адрэр чIыпIэ ыкIи республикэ бюджетхэм къа­тIупщы.