МыIэрысэ пасэхэм яугъоин фежьагъэх
Адыгеим ичIыгулэжьхэр пасэу зигъо хъурэ мыIэрысэ лъэпкъхэм яугъоин фежьагъэх.
Джэджэ районымкIэ А. А. ЛэупакIэмрэ И. С. Пичугинамрэ гектари 5-м мыIэрысэ тонни 165-рэ къырахыжьыгъ.
ПстэумкIи мыIэрысэ чъыгхэм аубытырэр гектар мини 4,5-рэ. ТехнологиякIэхэм яшIуагъэкIэ къагъэкIырэ чъыгхэм мыIэрысэу къапыкIэрэм хагъэхъон алъэкIы. УФ-м мэкъу-мэщымкIэ и Министерствэ и Гупчэ къызэритыгъэмкIэ, чъыгхэтакIэхэм яшIуагъэкIэ 2032-рэ илъэсым нэс тонн мини 6,9-рэ фэдиз мыIэрысэ къахьыжьын алъэкIэу хъущт (2028-рэ илъэсым нэс, проектхэм янахьы-
бэм къызэрэдалъытэрэмкIэ, ащ фэдиз пчъагъэм нагъэсышъу хъущт). 2032-рэ илъэсым промышленнэ шIыкIэм Адыгэ Республикэм зыщытехьэхэкIэ, а пчъагъэр тонн мин 60-м нагъэсышъущт.
Адыгеим исхэм мыIэрысэм еплъыкIэ гъэнэфагъэ фыряI: мыIэрысэр гъэбэжъум, гъэкIэжьыным ятамыгъэу алъытэ. Нарт эпосым къыхэфэрэ Дышъэ мыIэрысэ чъыгым мыIэрысэ лъэпкъитIу къытыщтыгъ: зыхэм мафэ къэс тыгъэм икъохьажьыгъом ягъо хъущтыгъ, пчэдыжьым тыгъэм инэбзыйхэм мыIэрысэ кIэлъэныкъор плъыжьы ашIыщтыгъ, адрэ кIэлъэныкъор фыжьэу къанэщтыгъ. Ахэм кIочIэ гъэшIэгъон яIэу алъытэщтыгъ. Таурыхъхэм къызэрахафэрэмкIэ, бзылъфыгъэу кIэлъэныкъо плъыжьым ецакъэрэм кIалэ къыфэхъущтыгъ, фыжьым — пшъашъэ. Адыгеим икъэлэ шъхьаIэ ыцIи къикIырэр «мыехэм якъуап» — Мыекъуапэ.