Адыгеим и ЛIышъхьэу КъумпIыл Мурат Кавказ инвестиционнэ фо­румым ипрограммэ хэлэжьагъ. Ащ къыдилъытэщтыгъ Адыгеим ин­вестициехэмкIэ ыкIи экономикэмкIэ амалэу иIэхэм зягъэушъомбгъу­гъэным иIофыгъохэмкIэ зэдэгущыIэгъу заулэ.

Республикэм и ЛIышъхьэ къызэрэхигъэщыгъэмкIэ, Адыге­им тапэкIи хэхъоныгъэ ышIынымкIэ, инвестиционнэ проектыкIэхэр пхырыщыгъэнхэмкIэ, социальнэ ыкIи экономикэ пшъэрылъхэр зэшIохыгъэнхэмкIэ анахь мэхьанэ зиIэхэм ащыщых инфраструктурэм хэхъоныгъэ егъэшIыгъэныр ыкIи энергием икъэкIуапIэхэр зэримыкъухэрэм къыкIегъэчыгъэныр. Ащ пае Адыгеир чанэу адэлажьэ Россетьхэм ыкIи Газпромым. Джащ фэдэу партиеу «Единэ Россиер» кIэщакIо зыфэхъугъэ ыкIи УФ-м и Президентэу Владимир Путиным къызыдыригъэштэгъэ программэу газыр икъоу аIэкIэгъэ­хьэгъэным хэлажьэ.
Программэм игъэцэкIэн зэ­рэкIощтым тегущыIагъэх АР-м и ЛIышъхьэу КъумпIыл Муратрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз» зыфиIорэм игенеральнэ пащэу Сергей Густовымрэ. ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэ игуадзэу ЛIыхэсэ Махьмудрэ АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Зауррэ.
НепэкIэ республикэм лъэIу тхылъ 12647-рэ щаштагъ, гъэстыныпхъэ шхъуантIэм ихъы­тыухэм апашIэным пае зэзэгъы­ныгъэ 10315-рэ зэдашIыгъ. Ащ нэмыкIэу хэпIэ 10755-мэ газыр ящэлIэгъэнымкIэ техническэ амалхэр щыIэ хъугъэх. ЧIыгу Iахьхэм ягъунапкъэхэм а гъэстыныпхъэр анэгъэсыгъэнымкIи зэзэгъыныгъэ 9152-р гъэцэкIагъэ хъугъэ, ахэм ащыщэу 3542-мэ ар аIэкIагъэхьэгъах. Социальнэ мэхьанэ зиIэ, гъэсэныгъэ зыщарагъэгъотырэ ыкIи медицинэ учреждениехэм гъэстыныпхъэ шхъуантIэр ящэлIэгъэнымкIэ зэкIэлъыкIокIэ гъэнэфагъэм тетэу IофшIэнхэр зэшIуахых.
«УФ-м и Президентэу Владимир Путиным, хэгъэгум и Правительствэ тафэраз социальнэ газификацием ипрограммэ республикэм щызэшIохыгъэ хъуным анаIэ къызэрэтырагъэтырэм, IэпыIэгъу къызэрэтфэ­хъухэрэм апае. Тэ Урысыем энергетикэмкIэ и Министерствэ чанэу тыдэлажьэ, джащ фэдэу Газпромыми гъусэныгъэ дытиI гъэстыныпхъэ шхъуантIэмкIэ инфраструктурэр цIыфхэм ­икъоу къызфагъэфедэн алъэкIыным иIофыгъо изэшIохынкIэ. Джащ фэдэ IофшIэнэу тызэгъусэу зэ­дэдгъэцакIэрэм ишIуагъэкIэ гъэстыныпхъэ шхъуантIэр аIэкIэгъэхьэгъэным ылъэныкъокIэ республикэм гъэхъэгъэ инхэр ышIыгъэх, 2025-рэ илъэсым ыкIэм ехъулIэу ар процент 96,65-м нэдгъэсын гухэлъ тиI. Республикэм исоциальнэ-экономикэ хэхъоныгъи ащ ишIо­гъэшхо къекIыщт», — къыIуагъ КъумпIыл Мурат.

АР-м и ЛIышъхьэ къызэрэхигъэщыгъэмкIэ, шъолъырхэм азыфагу илъ зэфыщытыкIэхэр гъэпытэгъэнхэмкIэ, гъусэныгъэ зыдытиIэщт Iэшъхьэтетхэр къэгъотыгъэнхэмкIэ Кавказ инвестиционнэ форумым мэхьанэшхо иI.
«Апэрэ Кавказ инвестици­оннэ форумым къыгъэлъэ­гъуагъ хэгъэгум и Къыблэ ичIыпIэ хэ­хыгъэу, гугъэпIэ инхэр къэзытэу зэрэщ­ытыр ыкIи тапэкIи ащ хэлэжьэрэ пстэуми хэхъоныгъэ ашIынымкIэ амалышIухэр къызэритыщтхэр. А хъугъэ-шIагъэу экономикэмкIэ мэхьэнэ гъэнэфагъэ зиIэр шъолъырхэм азыфагу илъ зэпхыныгъэхэр гъэпытэгъэнхэмкIэ, IофшIэкIэшIумкIэ зэхъожьынхэмкIэ, пэрыт IофшIакIэу яIэхэм защы­гъэгъозэгъэнымкIэ, кIэкIэу къэ­пIон хъумэ, Темыр Кавказым IофшIэным епхыгъэ Iофтхьабзэу щызэрахьэхэрэм нахь чаныгъэ ахэлъхьэгъэнымкIэ амалышIу хъущт. Тиреспубликэ а форумым зэрэхэлэжьагъэм шIуагъэ къызэритыщтыр нэрылъэгъу. Тапэ­кIи зэдэтшIыгъэгъэ зэзэгъыныгъэхэр къыддэхъунхэм тыщэгугъы. Адыгеир ыпэкIэ лъыкIотэным, республикэм экономикэмкIэ иамалхэм ахэхъоным апае тфэлъэкIыщтыр зэкIэ тшIэщт», — къыхигъэщыгъ АР-м и ЛIы­шъхьэ.
Шъугу къэтэгъэкIыжьы: илъэ­сэу икIыгъэм республикэм иэкономикэ инвестициеу хахъо фэзышIыгъэр сомэ миллиард 61,6-рэ. Лъэпкъ рейтингымкIэ анахь хэхъоныгъэ ин мы лъэныкъомкIэ илъэсэу икIыгъэм зышIыгъэхэр загъэунэфхэм, Адыгеир анахь гъэхъэгъэшхо зиIэ шъолъыр 15-мэ ахэфагъ. Мы илъэсым иапэрэ мэзищ, 2023-рэ илъэсым ащ фэдэ илъэ­хъан елъытыгъэмэ, инвести­циехэр фэди 2,3-кIэ нахьыбэ хъугъэх. ДжырэкIэ Iоф зыда­шIэрэ проектхэр сомэ миллиард 80-м шIокIырэ инвестицие­хэм япхыгъэх.
Адыгэ Республикэм и ЛIышъхьэ
ипресс-къулыкъу къытыгъэ къэбархэмкIэ
Тхьаркъохъо Сафыет.