Автомобиль гъогухэм я ГъэIорышIапIэу «Адыгеяавтодорыр» зызэхащагъэр тыгъуасэ илъэс 15 хъугъэ. Ащ ипащэу Алексей Корешкиныр а мафэм къэбар жъугъэм иамалхэм ялIыкIохэм аIукIагъ.

Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу 2024-рэ илъэсым иапэрэ мэзих зэшIохыгъэ хъугъэхэр ары анахьэу ар къызтегущыIагъэр.

Журналистхэм яупчIэхэм джэуапхэр къаритыжьзэ Алексей Корешкиным къы­зэриIуагъэмкIэ, мыгъэ пстэумкIи гъогу Iахь 18 агъэкIэжьынэу агъэнэфэгъагъ. Ар километрэ 47-м ехъу, сомэ миллиардрэ миллиони 100-рэ пэIухьащт. Мы уахътэм Iахьи 10-р агъэцэкIэжьыгъах, IофшIэнхэм япроцент 65-рэ хагъэкIы­гъэу мэхъу. Мы илъэсым иIоныгъо мазэ нэс къэнагъэр аухынэу ары гухэлъэу яIэр.
Мыщ дэжьым къыщыхэгъэщыгъэн фаер лъэпкъ проектым къыдыхэлъытэгъэ пIалъэхэм апэ итхэу IофшIэнхэр зэрэзэшIуахыхэрэр ары. Мы уахътэм агъэцэкIэжьыхэрэр къэкIорэ илъэсым Iоф зыщашIэнэу агъэнэфэгъэгъэ гъогу Iахьхэр ары. Ащ тетэу тапэкIи Iоф ашIэным, пIалъэхэм зыпарэкIи ауж къимынэнхэм зэрэпылъыщтхэм «Адыгеяавтодорым» ипащэ къыкIигъэтхъыгъ.
Алексей Корешкиным къызэриIуагъэм­­кIэ, агъэкIэжьыщт чIыпIэм икъы­хэхынкIэ цIыфэу республикэм исхэм яшIоигъоныгъэхэр, яеплъыкIэ къыдалъы­тэ, ау ащ имызакъоу, гъогухэм язытет ащ фытегъэпсыхьэгъэ оборудованиемкIэ зэрагъашIэшъ, ащ къыпкъырыкIхэзэ ашIыжьыщт Iахьхэр къыхахых.

Гъэмэфэ фабэхэм гъогухэмкIэ гумэкIыгъоу къыздахьырэр асфальтэу ­ателъым иягъэ зэрэригъэкIырэр ары. Мыгъэ мары фэбэ дэд, градус 38 — 40-м нэсэу дэкIуае. Ащ фэдэ зыхъукIэ, асфальтыр мэушъэбышъ, хьылъэзещэ автомашинэшхоу рычъэхэрэм ар зэщагъакъо.
Алексей Корешкиным ащ хэкIыпIэу къыфагъотырэм фэгъэхьыгъэ упчIэм джэуап къыритыжьызэ къызэриIуагъэмкIэ, хьылъэзещэхэр пчыхьэм сыхьатыр 9-м нахьыжьэу гъогухэм атехьанхэ фимытхэу къызщиIорэ унашъо УФ-м транспортымкIэ и Министерствэ къыдигъэкIыгъ.
Шъыпкъэ, ар зымыгъэцакIэхэрэри щыIэх, ау ахэм япчъагъэ нахь макIэ хъуным анаIэ тет. АщкIэ хьылъэзещэ автомашинэхэм зэращэрэр зыфэдизыр къэзыщэчырэ системэу гъогухэм атырагъэуцуагъэхэм яшIуагъэ къэкIо. Къэралыгъо автомобиль инспекциери IэпыIэгъу къафэхъу.
Ежь Алексей Корешкиным къэбар жъугъэм иамалхэр къызфигъэфедэхэзэ, предпринимателэу хьылъэзещэ автомашинэхэр зыгъэзекIохэрэм закъыфигъэзагъ. Мэфэ фабэхэм ахэр гъогухэм атырамыгъэхьанхэу, шапхъэхэм ашIокIэу амыушъэнхэу ар къялъэIугъ.
ХЪУТ Нэфсэт.