КIэлэцIыкIу 350-м нахьыбэм мэфэ 21-м «Движение первых» зыфиIорэм иIофшIэн илъэныкъо зэфэшъхьафхэмкIэ егъэджэнхэр акIущтых. АщкIэ зичэзыу едзыгъор кIэлэцIыкIу зыгъэпсэфыпIэу «Лань» зыцIэм щаублагъ.

Шъэожъыехэми пшъэшъэжъыехэми лъэныкъо пстэумкIи хахъо ашIышъуным егъэджэным къыдыхэлъытэгъэ Iофтхьабзэхэр тегъэпсыхьагъэх. ТворчествэмкIэ, спортымкIэ, шIэныгъэмкIэ, культурэмкIэ ыкIи искусствэмкIэ IэпэIэсэныгъэу ахэ­лъыр, тарихъымкIэ шIэныгъэу аIэкIэ­лъыр ныбжьыкIэхэм аушэтын, къызхагъэщын алъэкIыщт.
«КIэлэцIыкIухэм егъэджэн, лекцие, зэIукIэгъу гъэшIэгъонхэр къапыщылъых. Джащ фэдэу патриотическэ Iофтхьабзэхэри къяжэх. Пчэдыжь къэс быракъхэм ядэщэенкIэ ыкIи республикэмрэ къэралыгъомрэ ягимнхэм якъэIонкIэ ахэм мафэр аублэщт, хэушъхьафыкIыгъэ дзэ операцием хэлажьэхэрэм афэтхэщтых, шIухьафтынхэр афашIыщтых», — къыщаIуагъ АР-м гъэсэныгъэмрэ шIэныгъэмрэкIэ и Министерствэ.
Мыщ фэдэ зыгъэпсэфыкIэм икIэщакIохэр кIэлэцIыкIухэм ыкIи ныбжьыкIэхэм я Урысые общественнэ-къэралыгъо зэхахьэу «Движение первых» зыфиIорэм икъутамэу Адыгеим щыIэмрэ АР-м гъэсэныгъэмрэ шIэныгъэмрэкIэ и Министерствэрэ.
Анцокъо Ирин.
Сурэтыр: АР-м гъэсэныгъэмрэ шIэныгъэмрэкIэ и Министерств.