Фондэу «Хэгъэгум иухъумакIохэмрэ» Урысые обществэу «ШIэныгъ» зыфиIорэмрэ зэгъусэхэу федеральнэ патриотическэ Iофтхьабзэу «Хэгъэгум къулыкъу фэсэхьы» зыфиIорэр бэдзэогъум и 10-м аублагъ.

Ащ мурад шъхьаIэу иIэр хэушъхьафыкIыгъэ дзэ операцием иветеранхэр ныбжьыкIэхэм аIукIэхэзэ, лIыгъэу зэрахьагъэр, Хэгъэгур къаухъумэнэу теубытагъэ зыкIашIыгъэр къафаIотэнхэр ары. Къэралыгъор къызэраухъумэрэм, итарихъ, ишэн-хабзэхэр къызэрэзэтырагъанэхэрэм тинепэрэ лIыхъужъхэр ежьхэм ящысэкIэ ныбжьыкIэхэм адэгощэнхэ амал яI.
Iофтхьабзэр шIыкIэ зэфэшъхьафхэмкIэ рагъэкIокIыщт. Проектэу «ШIэныгъ. ЛIыхъужъхэр» зыфиIорэм къыдыхэлъытагъэу хэушъхьафыкIыгъэ дзэ операцием иветеранхэм лекциехэр, лIыхъужъныгъэм иурокхэр кIэлэцIыкIу гъэмэфэ лагерьхэм ащызэхащэщтых, джащ фэдэу ныбжьыкIэхэм япатриотическэ пIуныгъэ фэIорышIэщт нэмыкI Iофтхьабзэхэри рагъэкIокIыщтых. Урысыем ишъолъырхэм ащыщхэм лекторхэр щагъэнэфэгъахэх, ахэм зэлъашIэрэ дзэ корреспондентхэр ахэтых.
— Мы уахътэм патриотическэ пIуныгъэм исистемакIэу агъэпсырэм мэхьанэ щызиIэхэр Урысыем ифедэхэр къэзыухъу­мэнхэу еуцолIагъэхэр ары. Хэти анахь дэгъоу хэушъхьафыкIыгъэ дзэ операцием иветеранхэм лIыгъэм, Хэгъэгум, лIыхъужъныгъэм афэгъэхьыгъэу шъыпкъэр кIэлэцIыкIухэм къафаIотэн алъэкIыщт. ЛIыхъужъхэм къя­хъулIэгъэ къэбарэу къаIуа­тэхэрэм ягуапэу агу рихьэу ныбжьыкIэхэр къедэIух, — къы­Iуагъ Урысыем зыкъэухъумэжьынымкIэ иминистрэ игуадзэу, фондэу «Хэгъэгум иухъу­макIохэр» зыфиIорэм итхьаматэу Анна Цивилевам.
Iофтхьабзэм къыдыхэлъытагъэу, обществэу «ШIэныгъ» зыфиIорэм методическэ тхыгъэ­хэр ыгъэхьазырыгъэх ыкIи зезыщэщтхэр рагъаджэх.
— Iофтхьабзэу «Хэгъэгум къулыкъу фэсэхьы» зыфиIорэр зыпсэ емыблэжьэу Хэгъэгум итарихъ зытхырэ тилIыхъужъхэм къыткIэхъухьэрэ лIэужхэр аIукIэнхэмкIэ амалышIу. Патриотизмэм имэхьанэ нахь куоу зэхашIэнымкIэ, цIыф гъэнэфагъэхэм лIыгъэу зэрахьагъэм рыгушхонхэмкIэ мыщ фэдэ зэIукIэгъухэм яшIуагъэ къэкIощт. Мы уахътэм зэкIэми типшъэ­рылъыр – Урысыем илIэуж пстэури а шIэжьым зэрипхыныр, — хигъэунэфыкIыгъ Урысые обществэу «ШIэныгъ» зыфиIорэм игенеральнэ пащэу Максим Древаль.
Iофтхьабзэм хэлэжьэнхэу лектор нэбгыри 100-мэ зарагъэ­тхыгъах, зэрэрахъухьэрэмкIэ, мы илъэсым иIоныгъо мазэ ар заухыкIэ, а пчъагъэр 300-м нэсыщт. Мы илъэсым патриотическэ проектхэм ныбжьыкIэ миллионым ехъу къыхагъэлэжьэнэу фондым егъэнафэ.
Къэралыгъо фондэу «Хэгъэгум иухъумакIохэр» зыфиIорэм Iоф зишIэрэ илъэсым къыкIоцI ныбжьыкIэхэм япатриотическэ пIуныгъэ хэушъхьафыкIыгъэ дзэ операцием иветеран 3500-м ехъу къыхигъэлэжьагъ. Джащ фэдэу зэрэкъэралыгъоу патриотическэ нэшанэ зиIэ Iофтхьэбзэ мин 25-м ехъурэмэ якIэщэкIуагъ, ахэм пстэумкIи кIэлэцIыкIу ыкIи ныбжьыкIэ нэбгырэ мин фэдиз ахэлэжьагъ.
Iэшъынэ Сусан.
Сурэтыр: фондэу «Хэгъэгум
иухъумакIохэр».