Проектэу «2024 — 2025-рэ ­илъэсхэм кIэлэцIыкIухэм ящы­нэгъончъагъэ епхыгъэ Iофтхьабзэхэм республикэм зыщягъэу­шъомбгъугъэныр» зыфиIорэр Адыгеим щагъэцакIэ.

Ащ тегъэпсыхьагъэу кIэлэцIыкIухэр зиIэ бзылъфыгъэхэу чIыпIэ зэжъу ифагъэхэм IэпыIэгъу язытыщт къулыкъур зэхащэщт. Джащ фэдэу джэгукIэ зэфэшъхьафхэр зыщагъэфедэщтхэ терапевт ыкIи сенсорнэ кабинетхэр, зыщызэрагъэшIужьыщтхэ унэхэр къызэIуахыщтых.
Адыгэ Республикэм IофшIэнымрэ социальнэ хэхъоныгъэмрэкIэ и Минис­терствэ кIэщакIо зыфэхъугъэ мы социальнэ проектым унагъохэу кIэлэцIыкIу­хэр зэрысхэм, анахьэу етIани щыIэныгъэм чIыпIэ зэжъу ригъэуцуагъэхэм, Iэ­пыIэгъу ятыгъэнымкIэ Урысые Федерацием ишъолъырхэм ясоциальнэ проектхэм якъыхэхын епхыгъэ зэнэкъокъоу кIуагъэм текIоныгъэр къыщыдихыгъ.
Ащ ишIуагъэкIэ чIыпIэ зэжъу ифэгъэ кIэлэцIыкIухэм IэпыIэгъу ятыгъэнымкIэ Фондым ипрограммэу «ЩыIэныгъэр сэгъэлъапIэ!» зыфиIорэм Адыгэ Республикэр хэлэжьэнэу хъугъэ. Мы программэм грантэу сомэ миллион 15-рэ мин 967-рэ къыделъытэ.
— Iофтхьабзэхэр пхырыщыгъэнхэм гухэлъ шъхьаIэу иIэр жъалымыгъэ хэлъэу зыдэзекIогъэхэ ыкIи бзэджэшIагъэ зыдызэрахьэгъэ кIэлэцIыкIухэу чIыпIэ къин ифагъэхэм IэпыIэгъу ятыгъэныр ары. Социальнэ лъэныкъомкIэ икъоу мыухъумэгъэ кIэлэцIыкIухэу ыкIи унагъохэу сабыйхэр зэрысхэм япчъагъэ къыкIегъэчыгъэнымкIэ ащ фэдэ Iоф­тхьабзэхэм шIуагъэ къатыщт, — къыщаIуагъ АР-м IофшIэнымрэ социальнэ хэхъоныгъэмрэкIэ и Министерствэ.
Демографием ылъэныкъокIэ Iофхэм язытет нахьышIу шIыгъэным пае хэу­шъхьафыкIыгъэ пшъэрылъхэри зэшIуахых. Шъугу къэдгъэкIыжьын: кIэлэцIыкIухэр зэрыс унагъохэм IэпыIэгъу ятыгъэным пае лъэпкъ проектэу «Демографием» къыдыхэлъытагъэу илъэс къэс Iофтхьэ­бзэ гъэнэфагъэхэр зэрахьэх. Мы илъэсым сомэ миллиарди 6,6-рэ фэдиз рес­публикэм а гухэлъхэм щапэIуагъэ­хьащт. КIэлэцIыкIухэр къызыхъухэкIэ зэтыгъоу ыкIи мазэ къэс аратыщтым, фэгъэкIотэныгъэхэр афэшIыгъэнхэм, кIэлэцIыкIухэм языгъэпсэфыгъо уахътэ тэрэзэу зэхэщэгъэным (ащ къыхеубытэх Херсон хэкумкIэ Геническэ районым
ис кIэлэцIыкIухэри) ар апэIуагъэхьащт. Пшъэ­рылъыбэ зэшIозыхырэ унэгъо гупчэхэри къызэIуахыгъэх. Ащ нэмыкIэу илъэсэу икIыгъэм къыщыублагъэу гъот макIэ зиIэ унагъохэу гурыт сэнэхьат гъэсэныгъэ къэзытырэ учреждениехэм зикIэлэцIыкIухэр ащеджэхэрэм ыпкIэу атырэм ипроцент 30-р къэралыгъом къафилъэгъужьыщт, ау мыщ дэжьым къэIогъэн фае студентхэр дэгъоу е дэгъу дэдэу еджэнхэ зэрэфаер. 2024-рэ илъэсым къыщыублагъэу къулыкъоу «Пункт проката» зыфиIорэм Адыгеим Iоф щишIэу ригъэжьэщт. Гъот макIэ зиIэ унагъохэу кIэлэцIыкIухэр зэрысхэм ыпкIэ хэмылъэу анахь ящыкIэгъэ пкъыгъо­хэр ащ къащаратыщтых. Къалэу Мые­къуапэрэ къуаджэу Тэхъутэмыкъуаерэ пстэуми апэу а Iофыр зыщызэхащэщтыр.
Мы илъэсым Владимир Путиным ышIыгъэ унашъом тетэу сабыибэ зэрыс унагъохэм ястатус федеральнэ лъэгапIэм тетэу гъэпытэжьыгъэ хъугъэ. Сабый ана­хьыжъыр илъэс 18 е 23-рэ (очнэу еджэ зыхъукIэ) охъуфэ къэралыгъо Iэпы­Iэгъур унагъом къыратыщт. Ащ нэмыкIэу илъэсэу къихьащтым къыщегъэжьагъэу УФ-м и Президент кIэщакIо зыфэхъугъэ лъэпкъ проектэу «Унагъом» игъэцэкIэн аублэщт. ЧIыпIэ зэжъу ифэгъэ унагъохэм амалэу яIэхэм хэпшIыкIэу ащ къахи­гъэхъощт.