В. А. Алмазовым ыцIэ зыхьырэ Лъэпкъ медицинэ ушэтэкIо Гупчэм иIофышIэхэр Адыгеим къеблэгъагъэх. ЛIыкIо купыр республикэм имедицинэ учреждениехэм ащыIагъ ыкIи ахэм яIофшIэн осэшIу къыфашIыгъ.

Гу-лъынфтэ узхэм алъэныкъокIэ мы Гупчэр республикэм иупчIэжьэгъоу щыт, арышъ, илъэсым тIогъогогъо Адыгеим къэкIох. Мы аужырэ IофшIэгъу дэкIы­гъоу яIагъэм изэфэхьысыжьхэм къызэра­гъэлъэгъуагъэмкIэ, реабилитацие системэр шапхъэхэм адиштэу республикэм щызэхэщагъ. Джащ фэдэу лъэхъаным диштэу операциехэр, стентированиер, шунтированиер тиспециалистхэм зэрашIырэр хагъэунэфыкIыгъ. Джыри тапэкIэ анаIэ нахь зытырагъэтын фэе лъэныкъохэри къыхагъэщыгъэх. Ахэм ащыщ уз гъэтIылъыгъэхэр зиIэу диспансер учетым хэтхэм Iоф адэшIэгъэныр.
— Инфаркт зиIэр псынкIэу сымэджэщым къынэдгъэсыныр, игъом IэпыIэгъу едгъэгъотыныр зэдгъэшIагъ. Ау джыри гу-лъынтфэ узхэм апкъ къикIыкIэ яунэ исхэу цIыфыбэм ядунай ахъожьы. Ахэр уз гъэтIылъыгъэ зиIэхэу, игъом зэзымы­гъэIазэхэрэр, диспансеризациер зымыкIухэрэр е врачым къафитхыгъэр зымыгъэцакIэхэрэр ары. Джа цIыф купым джы Iоф адэтшIэн фае, — къыIуагъ АР-м псауныгъэр къэухъумэгъэнымкIэ министрэу Мэрэтыкъо Рустем.
Диспансеризацием къыдыхэлъытагъэу анаIэ зытырадзэнэу агъэнэфагъэхэм ащыщ Iоф зышIэшъун ныбжьым къыхиубытэрэ хъулъфыгъэхэр. Бзылъфыгъэхэм анахьи хъулъфыгъэу гу-лъынфтэ узхэм арылIыкIыхэрэм япчъагъэ фэдитIукIэ нахьыб.