Бэдзэогъум и 16 — 19-м ­Адыгеим лъэшэу щыфэбэщт. Градус 39-м фабэр нэсыщт.

Ащ фэгъэхьыгъэу къытыгъ ошIэ-дэмышIэ IофхэмкIэ Министерствэм и ГъэIорышIапIэу АР-м щыIэм. Мы къулыкъум къызэритырэмкIэ, ошIэ-­дэмышIэгъэ тхьамыкIагъохэр къэ­хъунхэ ылъэкIыщт, трансформатор подстанциехэр лъэшэу зыплъыхэкIэ, цIыфхэм ящыIэныгъэкIэ мэхьа­нэшхо зиIэ псэуалъэхэр зэщыкъонхэ алъэкIыщт.
Ащ къыхэкIэу республикэм машIом зыкъыщимыштэным нахь фэсакъынхэ фае. Уц гъугъэр агъэсты, мэзхэм къапэблагъэу машIо ашIы хъущтэп, сыда пIомэ цIыф псэупIэхэм зэрар къафэзыхьын зылъэкIыщт мэшIошхо­хэр ахэм апкъ къикIынхэкIэ щынагъо.