Гъэстыныпхъэ шхъуантIэр зимыIэхэм ящагухэм ыпкIэ хэмылъэу афещэлIэгъэным фэгъэхьыгъэ программэм къыщыдэлъытагъэхэр гъэцэкIагъэ зэрэхъухэрэм щытегущыIагъэх ащ фэгъэзэгъэ штабэу АР-м щызэхащагъэм иIэгъэ зэхэсыгъом.

Ащ хэлэжьагъэх АР-м иминистрэхэм я Кабинет ипащэу КIэрэщэ Анзаур, ащ игуадзэу ЛIыхэсэ Махьмуд, шъолъыр Парламентым и Тхьаматэу Владимир Нарожнэр, АР-м экономикэ хэхъоныгъэ­хэмкIэ ыкIи сатыумкIэ иминистрэу Шэуджэн Заур, Iахьзэхэлъ обществэу «Газпром газораспределение Майкоп» зыфиIорэм ипащэу ЕкъутэкI Аслъан. Муниципальнэ образованиехэм япащэхэри пэIудзыгъэ шIыкIэм тетэу къыхэлэжьагъэх.
ЕкъутэкI Аслъан зэрэщигъэгъозагъэ­хэмкIэ, гъэстыныпхъэ шхъуантIэр зимыIэхэм ялъэIу тхылъэу 10929-рэ пстэумкIи къаIэкIэхьагъ, газ сетьхэм апышIэгъэнхэм фэгъэхьыгъэ зэзэгъыныгъэу зыкIэтхагъэхэр 10239-рэ мэхъу. А пчъагъэм щыщэу щагу 2565-мэ зэраращэлIэщтым имызакъоу, унэхэм аращэнэу ыкIи ащызэбгыращынэу зэзэгъыныгъэ къадашIыгъ. ЗичIыгу гъунапкъэ ращэлIагъэр 9118-рэ мэхъу, унэгъо 3376-мэ гъэстыныпхъэ шхъуантIэр афатIупщыгъ.
СНТ-р мы программэм зэрэхэхьащтхэми мы зэхэсыгъом щытегущыIагъэх. УФ-м и Президентэу Владимир Путиным Федеральнэ ЗэIукIэм фигъэхьыгъэ Джэпсалъэм ар шIокI зимыIэ Iофэу зэрэщытыр къыщыхигъэщыгъагъ.
Гъэстыныпхъэ шхъуантIэр зыIэкIэхьэрэ псэупIэм хэхьэрэ е ащ игъунапкъэ пэблагъэу щыт товариществэхэр ары ащ къыхиубытэщтхэр. Ахэм ащыпсэухэ­рэр «социальнэ газификацием» хэлэжьэнхэм пае зэрэзекIощтхэр, тхы­лъэу агъэхьазырыщтхэр, нэмыкIэу ящыкIагъэ­хэр къызщиIорэ тхылъ Росреестрэм къыгъэхьазырыгъ. Ар зищыкIагъэхэм мы къулыкъум иинтернет нэкIубгъо нэIуасэ зыщыфашIын амал яI.
Программэм къыхиубытэрэ товариществэу Адыгеим итыр пстэумкIи 38-рэ. Ахэр къалэу Мыекъуапэ, Мыекъопэ, Тэхъутэмыкъое ыкIи Теуцожь районхэм ахэхьэх.
ПсэупIэ-коммунальнэ хъызмэтым, промышленностым, нэмыкIхэм япхыгъэ организациехэм гъэстыныпхъэ шхъуан­тIэр зэраIэкIэхьащт схемэхэр зэрамыгъэхьазырыгъэхэми игугъу зэхэсыгъом щашIыгъ. Ащ ыпкъ къикIыкIэ «догазификацием» ипрограммэ ипхырыщын шъолъырым къыщызэтеуцонкIэ щынагъо. Муниципальнэ образованиехэм япащэхэм ащ анаIэ тырагъэтынэу афагъэпытагъ. 2024-рэ илъэсым ишэкIогъу мазэ и 1-м шIомыкIэу схемэхэр къагъэхьазырынхэ фае.
— Гъэстыныпхъэ шъхъуантIэр цIыфхэм аIэкIэгъэхьэгъэным республикэм ипащэхэм лъэшэу анаIэ тет. Мы Iофым хэлажьэрэ пэпчъ пшъэрылъ гъэнэфагъэ иI. Ахэр хэзыгъэ фэмыхъоу агъэцакIэхэмэ, IофшIэнхэр пIалъэхэм ашIомыкIэу зэшIохыгъэ хъущтых, — къы­Iуагъ Владимир Нарожнэм.
АР-м и Къэралыгъо
Совет – Хасэр.