ХагъэунэфыкIырэ чIыпIиплI къыдахыгъ
Адыгэ Республикэм итеннисистхэр къалэу Кореновскэ щыкIогъэ зэнэкъокъум хэлэжьагъэх ыкIи чIыпIиплI къыщыдахыгъ.
Глоба Сергей Яков ыкъом ишIэжь фэгъэхьыгъэ зэIухыгъэ зэнэкъокъу Кореновскэ къэлэ псэупIэм щыкIуагъэхэм чIыпIэ спортсменхэм афэшъхьафэу, станицэу Выселки, къалэхэу Мыекъуапэ, Лэбапэ ыкIи поселкэу Яблоновскэм къарыкIыгъэ кIэлэцIыкIухэр хэлэжьагъэх. Адыгэ Республикэр шъэожъыитIурэ пшъэшъэжъыищырэ къагъэлъэгъуагъ. Илъэси 9, 11 ыкIи 13 зыныбжь купхэм ахэр щянэкъокъугъэх.
Мыекъуапэ щыщхэу Артем Вариводинрэ Бзаго Дамиррэ текIоныгъэхэр къыдахыгъэх. Ирина Славновам гурыт ныбжь купым ятIонэрэ чIыпIэр къыщихьыгъ, анахьыжъхэр зыхэт купым ящэнэрэ щыхъугъ Яблоновскэм щыщ Виктория Колгановар.
ТапэкIэ ахэр Урысые зэнэкъокъухэу «Урысыем инеущырэ маф» зыфиIоу Мыекъуапэ щыкIощтхэм ахэлэжьэщтых. Турнирыр столкIыIу теннисымкIэ федерацием ипрограммэ хэтэу шъолъыр зэфэшъхьафхэм ащырагъэкIокIы. Зэнэкъокъухэр шышъхьэIум и 20-м къыщыублагъэу и 25-м нэс кIощтых.