Адыгеим ибзылъфыгъэ гандбол командэу «АКъУ-Адыиф» зыфиIорэм изыгъэпсэфыгъо уахътэ ыухыгъ ыкIи суперлигэм хэхьэрэ командэхэр зыщызэнэкъокъущтхэ Урысыем ичемпионат зыфегъэхьазыры.

Бэдзэогъум ыкIэхэм анэс зыгъэхьазырынхэр къэлэ паркым ишъолъыр, стадионым ыкIи Мэз­дахэ идэкIояпIэхэм ащыкIощт. Командэм зэхъокIыныгъэхэр фэхъугъэх. Ащ нэбгырищ хэкIыжьыгъ: линейнэу щытыгъэ Валентина Томилинар, ар ЦСКА-м хэхьажьыгъ, Екатерина Голуновар ыкIи Виктория Мещеряковар. Голуновар илъэсыкIэ ешIэгъум «Пшызэм» щешIэщт, Мещеряковам зызыдигъэзэщтыр къэнэфагъэп. Тренерхэр къэнагъэх, командэм ипащэр Наталья Дерепаско — ыпэкIи фэдэу ар тренер шъхьаIэу щытыщт.

Адыгеим икомандэ къэзыгъэлъэгъощтхэм къахэхъуагъ. Алина Тишинар, ар «Ставропольем» пэрытэу щешIэщтыгъэхэм ащыщ, такъикъ 1423-рэ ешIэгъу уахътэ иI, Iэгоо 87-рэ дидзагъ. Командэр къыгъэлъэшынэу щэгугъых илъэс 20 зыныбжь Елизавета Суздальцевам, «Черноморочки» зыфиIорэм хэтыгъ, командэ шъхьа­Iэм пае Iэгоо 31-рэ дидзагъ, 91-р ятIонэрэ командэм пай. Суперлигэм зыкъыщигъэлъэгъонымкIэ Мыекъуапэ амалхэр щигъотыщтых. Ящэнэрэу командэм къы­хэхьагъэр «Уфа-Алисэм» щешIэщтыгъэ София Гогия. Софие икомандэкIэ ипэрытхэм ащы­щыгъ, иешIэгъу такъикъ уахътэ дыхэтхэм анахьыбагъ — 1509-рэ. ЗэкIэхэми илъэс пIалъэ иIэу зэзэгъыныгъэм адыкIэтхагъэх. ЕшIэгъухэр Iоныгъом аублэщтых.