Мыекъуапэ щыщ спортсменым зиIэпкъ-лъэпкъхэм фыкъуагъэ зиIэхэм азыфагукIэ Урысые кIэлэ­цIыкIу-ныбжьыкIэ зэнэкъокъухэу Подольскэ щы­кIуагъэхэм ятIонэрэ чIыпIэр къащыдихыгъ.

Шъолъырибгъумэ къарыкIыгъэ спортсмен 34-рэ зэнэкъокъум хэлэ­жьагъ. Гурыт еджапIэу N 3-м ще­джэрэ Дмитрий Нехаевэу илъэс пшIыкIуплI зыныбжьыр я 10-рэ классымкIэ ятIонэрэ чIыпIэр къыди­хыгъ. Ащ къытекIогъэ закъор Челябинскэ хэкум щыщэу, 2024-рэ илъэсым Урысыем и Кубок къыдэзыхыгъэ Никита Новиковыр ары ныIэп. Спортсменыр тренерэу Тать­яна Олейниковам егъасэ. Зэнэкъо­къум къыдыхэлъытагъэу адаптивнэ спортымкIэ мастер-классхэр зэхащагъэх. Ащ ишIуагъэкIэ кIэлакIэмэ следж-хоккеимкIэ, курэжъыем исхэу баскетбол ешIэнхэмкIэ, кушъхьэ­фэчъэ спортымкIэ, пауэрлифтингым­кIэ ыкIи армрестлингымкIэ акIуа­чIэхэр аушэтыгъэх.
Джащ фэдэу мэфэкI Iофтхьабзэ­хэу зиIэпкъ-лъэпкъхэмкIэ фыкъуагъэ зиIэ спортсменхэм афэгъэзэгъэ спорт Федерацием ыныбжь илъэс 25-рэ зэрэхъугъэм къыдыхэлъытагъэу паралимпийскэ десэр арагъэ­кIугъ. Урысыем и Паралимпийскэ комитет къыгъэнэфэгъэ шIухьафтын­хэр ыкIи мастер-классмэ зэрахэлэжьагъэхэр къэзыушыхьатыжьырэ шIэжь медальхэр спортсмен ныбжьыкIэмэ зэкIэмэ аратыгъэх.