Зы нэбгырэр зекIонымкIэ ыгъэфедэн ылъэкIыщт амалэу («средства индивидуальной мобильности» зыфиIоу СИМ-кIэ заджэхэрэр) джырэ лъэхъаным тигъогухэм нахь атетлъагъо хъугъэхэм узэрарызекIощтым пылъ шапхъэхэр къэралыгъо автоинспекторхэм Мыекъуапэ щыпсэухэрэм арагъашIэх.

А зигугъу къэтшIыгъэ зекIон амалым имызакъоу, кушъхьэфачъэхэри зэрагъэфедэн фаемкIэ зэдэгущыIэгъухэр инспекторхэм цIыфхэм адашIыгъэх. Iофтхьабзэр зыщырагъэкIокIыгъэр ахэр нахьыбэу зыщагъэфедэхэрэ чIыпIэу къэлэ паркыр ары.
Iофтхьабзэр зэхащэным ушъхьагъу фэхъугъэр мы аужырэ уахътэм кушъхьэфачъэр ыкIи СИМ-р бэрэ къэлэ кIоцIым гъогурыкIоным хэлажьэхэрэм щагъэфедэхэ зэрэхъугъэр, ахэр зыщызепфэмэ хъущт чIыпIэхэр ыкIи зэрарычъэщтхэм илъэшыгъэ икъоу зэрамышIэрэр ары.
ЛъэсрыкIохэм афэгъэхьыгъэ шапхъэхэм арыгъуазэхэзэ, лъэсрыкIо зэпырыкIыпIэм къызысхэкIэ, зытесхэ транспорт амалым къехынхэшъ, ар джабгъумкIэ аIыгъэу лъэсэу зэпырыкIынхэу зэрэщытым кушъхьэфачъэр ыкIи СИМ-р зикIасэхэм анаIэ тырарагъэдзагъ.

Инспекторхэм ны-тыхэм зафагъазэзэ, джырэ лъэхъаным диштэрэ зекIон амалыр япIалъэхэм къафащэфыным ыпэкIэ ар зэрагъэфедэщтым пылъ шапхъэхэм икъоу защагъэгъозэнэу, ащ щынагъоу къыхэкIын ылъэкIыщтхэр къыдалъытэнхэу араIуагъ.
Ны-тыхэу ащ фэдэ транспортыр зикIэлэцIыкIухэм къафэзыщэфыгъахэхэм ахэр зэрагъэфедэщтхэ шапхъэхэр зэпымыоу агу къагъэкIыжьынэу, фыкъоныгъэхэр хамыхынхэм фэшI шъхьэр, Iэ-лъакъохэр зыухъумэхэрэ пкъыгъохэр къафащэфынхэу полицейскэхэр къяджагъэх.
Iофтхьабзэм икIэухым а шапхъэхэр зэрытхэгъэ тхьапэхэр хэлэжьагъэхэм аратыгъэх.
АР-м и Къэралыгъо автоинспекцие.