Адыгеим и ЛIышъхьэу КъумпIыл Мурат Херсон хэкум и Геническэ район щыIагъ. Республикэм иIэпыIэгъу хэлъэу социальнэ мэхьанэ зиIэ псэолъэ заулэ ащ щашIы ыкIи щагъэцэкIэжьы.

КъумпIыл Мурат псэуалъэхэм япхыгъэ IофшIэнхэр зэрэкIохэрэм зыщигъэгъозагъ. Джащ фэдэу Херсон хэкум игубернаторэу Владимир Сальдо зэIукIэгъу дыриIагъ. Шъолъы­ритIумэ язэдэлэжьэныгъэ ыкIи Геническэ районым зыпкъ игъэуцожьын IофшIэнхэр зэрэщылъыкIотэщтхэм япхыгъэ Iофы­­гъохэм ахэр атегущыIагъэх.

Херсон хэкум и Правительствэ итхьаматэу Андрей Алексе­енкэр, Адыгеим илIыкIоу Херсон хэкум щыIэ Хъоткъо Хъызыр, республикэм ифирмэ псэолъэшI­хэм япащэхэр ащ хэлэжьагъэх.
ЗэдэгущыIэгъум къызэрэщыхагъэщыгъэмкIэ, хэгъэгум ишъо­лъырыкIэхэм мамыр щыIакIэр зыпкъ ащигъэуцожьыгъэнымкIэ Урысыем и Президентэу Владимир Путиным къыгъэуцугъэ пшъэрылъхэм мэхьанэшхо яI. Ащ пае илъэсищ фэдиз хъугъэу а шъолъырым IэпыIэгъоу ищыкIагъэр Адыгеим IэкIегъахьэ. Социальнэ мэхьанэ зиIэ псэуа­лъэхэр шIыгъэнхэмкIэ ыкIи ­зыпкъ игъэуцожьыгъэнхэмкIэ Iофышхо агъэцэкIагъ. Илъэсэу икIыгъэм сомэ миллион 460-м ехъу рес­публикэ бюджетым къыхагъэкIи а гухэлъхэм апэIуагъэхьагъ. Пшъэрылъыбэ зэшIозыхырэ Гупчэр агъэпсыгъ, спорт псэолъакIэхэр ашIыгъэх, общественнэ чIыпIэхэр, еджапIэхэр, кIэлэцIыкIу IыгъыпIэхэр агъэ­кIэжьыгъэх ыкIи зэтырагъэ­псыхьагъэх. «Псауныгъэм имэшIокухэр» зыфиIорэм тегъэ­псыхьагъэу упчIэжьэгъу афэ­хъух, илъэс къэс Геническэ районым къыращырэ кIэлэцIыкIухэм Адыгеим гъэмафэрэ зыщагъэпсэфы.
Херсон хэкум ипащэхэм къыз­эраIуагъэмкIэ, Адыгеим IэпыIэгъоу къаритырэм осэшхо фашIы а шъолъырым щыпсэухэ­рэм, АР-м и ЛIышъхьэ, респуб­ликэм зэкIэ щыпсэухэрэм ахэр афэразэх илъэсищ хъугъэу IэпыIэгъушхо къызэраратырэм пае. Ежь КъумпIыл Мурат къы­зэрэхигъэщыгъэмкIэ, хэгъэгум ишъолъырыкIэ нахь зыпкъ игъэуцогъэнымкIэ, зэтегъэ­псыхьэгъэнымкIэ республикэм ищыкIэгъэ IэпыIэгъур ащ ри­тыщт. АР-м и ЛIышъхьэ Херсон хэкум и Геническэ ыкIи и Новотроицкэ районхэм защэIэм, Адыгеим къикIыгъэ IофышIэхэр хэлажьэхэзэ псэуалъэу ашIыхэрэр зэригъэлъэгъугъэх. ГущыIэм пае, Чкаловскэ еджапIэм псауныгъэм игъэпытэн ыкIи спортым япхыгъэ гупчэ щашIы, спортым зыщыпылъыщтхэ чIыпIэр хьазыр, мы лъэ­хъэнэ благъэхэм джыри ахэр нахь зэтырагъэпсыхьанхэу рахъухьагъ. Геническэ районым и Новоалексеевскэ еджапIэу ­
N 2-м атлетикэ псынкIэм ыкIи спорт лъэпкъ зэфэшъхьафхэм зыщапылъыщтхэ гупчэ щашIы. ПсэолъэшIхэм къызэраIуагъэмкIэ, графикым диштэу IофшIэнхэр зэкIэ зэшIуахых ыкIи ­пIалъэу агъэнэфагъэхэм атефэу гъэцэкIагъэ хъущтых. ЫпэкIэ кIэлэцIыкIу IыгъыпIэу N 17-м, «ТеремоккIэ» заджэхэрэм, еджэпIэ-интернатым ахэт шхапIэхэм яинженер системэ игъэ­цэкIэжьын аухыгъ. Ащ нэмыкIэу еджапIэу N 2-м игъэкIотыгъэ гъэцэкIэжьынхэр рашIылIагъэх.

Адыгеим щыщхэу хэушъхьафыкIыгъэ дзэ операцием хэлажьэхэрэм ренэу анаIэ атырагъэты. КъумпIыл Мурат Адыгеим икIыгъэ дзэкъулыкъу­шIэхэу ыкIи хэбзэухъумакIохэу Херсон хэкум ищынэгъончъагъэ зынаIэ тезыгъэтхэрэм аIукIагъ ыкIи гущыIэгъу афэхъугъ. Рес­публикэм ихэбзэ къулыкъухэм, партиеу «Единэ Россием» хэтхэм ренэу анаIэ къызэратырагъэтырэм пае зэрафэразэхэр ахэм къаIуагъ.

«Геническэ районыр зыпкъ игъэуцожьыгъэнымкIэ Iофышхо гъэцэкIагъэ хъугъэ. Тизэдэлэжьэныгъэ тапэкIи нахь зедгъэушъомбгъущт, Урысые Федерацием и Президентэу Владимир Путиным къыгъэуцугъэ пшъэрылъхэу Херсон хэкум IэпыIэгъу етыгъэным епхыгъэхэр зэшIохыгъэ хъунхэм пае тфэлъэкIыщтыр зэкIэ тшIэщт. «Единэ Россием» тыригъусэу лъэныкъо зэфэшъхьафхэмкIэ къэуцурэ Iофыгъохэр зэшIотэхых. Проектхэм ягъэцэкIэн пшъэдэкIыжь хэлъэу типсэ­олъэшI­хэр зэрекIуалIэхэрэм пае тафэраз. ТынаIэ зытедгъэтырэ шъолъырым щыпсэурэ цIыфхэр Iофэу дгъэцакIэрэм, пIалъэхэр укъуагъэ зэрэмыхъухэрэм апае къытфэразэх, Адыгеим ылъэныкъокIэ IофтхьэбзэшIухэм афэ­хъурэ кIэуххэр янэрылъэгъух. ТапэкIи шъолъырыкIэм ищыкIэгъэ IэпыIэгъур зэкIэ еттыщт. Тызэгъусэу шъолъырхэм азыфагу илъ зэпхыныгъэхэм зядгъэушъомбгъущт ыкIи дгъэпытэщтых», — къы­Iуагъ КъумпIыл Мурат.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.