Зипсауныгъэ амалхэр зэщыкъогъэ сабыйхэр зычIэс Мыекъопэ кIэлэцIыкIу IыгъыпIэу N26-м лъапцIэу зэрыкIощтхэ «лъагъо» тыгъуасэ къыщызэIуахыгъ.

Мыр псауныгъэм ыкIи пкъы­шъолым ягъэпытэн, лъэгутешъо (плоскостопие) узыр ямыIэным фэIорышIэщт. Проектым кIэщакIо фэхъугъ мысатыушI организациеу «Социльнэ-культурнэ гукъэкIхэмкIэ агентствэу «Талантида» зыфиIорэр, Адыгэ къэралыгъо университетыр иIэпыIэгъоу.
Купэу «Три путешественника» зыфиIорэм ипроектэу «Место силы города» зыцIэм мы лъагъом ишIын къыдыхэлъытагъ.
— Мы кIэлэцIыкIу IыгъыпIэр анахьэу къызкIыхэтхыгъэр мыщ къакIохэрэм япсауныгъэ амалхэр зэрэзэщыкъуагъэхэм елъытыгъэу яшIуагъэ къекIынэу тлъытагъэшъ ары. ЦIыфым ­ылъэ­гу екIурэ лъынтфэхэм нэмыкI пкъынэ-лынэхэм яшIуагъэ зэкIын чIыпIэхэр хэтых. Арышъ, афэ­дгъэтIылъыгъэ «лъагъом» лъапцIэу зытеуцохэкIэ, уз зэфэшъхьафэу яIэхэм ащыщхэр хъу­жьынымкIэ ишIуагъэ къэ­кIонэу тыщэгугъы, — къыхигъэ­щыгъ «Талантидэм» ипащэу Карен Каракьян.
Ащ къызэриIуагъэмкIэ, лъагъор техъо зэфэшъхьафэхэр яIэу 7-у панэхэр зытет алырэгъур, пхъэ пыхыгъэхэр, псыхъо­хэм къахахыгъэ мыжъокIэ ­жъгъэй зэфэшъхьафхэр, ель щэкъмархэр. Мы «лъагъор» бгъэкощышъунэу щыI, фабэ зыхъукIэ, щагум щыбгъэуцун, ощх-ос лъэхъаным унэм ипхьажьын плъэкIыщт.
КIэпсэжъыер кIэлэцIыкIухэм зызэпаупкIым ыуж «лъагъор» аушэтын амал яIагъ. Ахэм ар ашIогъэшIэгъонэу пчъагъэрэ рыкIуагъэх.

КIэлэцIыкIу IыгъыпIэм икIэлэпIу шъхьаIэу Мэрэтыкъо Ларисэ къызэриIуагъэмкIэ, ыпэкIэ мыр кIэлэцIыкIу Унэу щытыгъ ыкIи илъэсипшI хъугъэ ныIэп IыгъыпIэ зашIыжьыгъэр. Мыщ чIэс сабыйхэм япсауныгъэ амалхэр зэщыкъуагъэх, зыхэр къэгущыIэхэрэп, адрэхэм аIэпкъ­лъэпкъхэм дагъохэр яIэх, ­икъоу ахахъорэп.
— Непэ шIухьафтынэу къытфашIыгъэмкIэ «Талантидэм» илIыкIохэм тафэраз. КIэлэцIыкIухэм япсауныгъэ, апкъышъол пытэнымкIэ, кIымафэм нахь макIэу сымэджэнхэмкIэ мы «лъагъом» ишIуагъэ къэкIонэу тыщэгугъы, — хигъэунэфыкIыгъ Ларисэ.

Iэшъынэ Сусан.
Сурэтхэр: Iэшъынэ Аслъан.