Урысые Федерацием и Президент чъыгхатэхэр зылэжьыхэрэм гъэ­стыныпхъэ шхъуантIэр ыпкIэ хэмылъэу аIэкIэгъэхьэгъэным епхыгъэ пшъэрылъэу къыгъэуцугъэхэр гъэцэкIагъэ хъунхэм пае Росреестрэм методическэ зэхэфынхэр зэхигъэуцуагъэх.

Ахэм «социальнэ догазификациекIэ» заджэхэрэ программэм цIыфхэр хэлэжьэн зэра­лъэкIыщтым иIофыгъохэр гурыIогъошIоу къащызэхэфыгъэх.
2024-рэ илъэсым мэзаем къэралыгъом и Пащэ Федеральнэ ЗэIукIэм фигъэхьыгъэ Тхы­лъым къыщеIо цIыф псэупIэхэм ягъунапкъэхэм къапэIулъ то­ва­риществэхэри а программэм къызэрэхиубытэхэрэр. ЦIыфхэр зыщыпсэухэрэ унэхэр зэрыт чIыгухэм ягъунапкъэхэм ыпкIэ хэмылъэу мы гъэстыныпхъэхэр ящэлIэгъэныр ары ащ зигугъу къышIырэр.
«Пстэуми апэу гъэстыныпхъэ шхъуантIэр зынагъэсыщтыр газрыкIуапIэхэр зыпэблэгъэ то­вариществэхэр ары. Къалэу Мыекъуапэ, Тэхъутэмыкъое ыкIи Теуцожь районхэм ятовари­ществэ 29-мэ зэкIэми апэу ар аращэлIэщт. Нэужым чъыгха­тэхэр зыдэщыIэ псэупIэхэм адакIоу адрэ къэнэгъэ товариществэхэми газыр аIэкIагъэ­хьащт», — къыхигъэщыгъ Рос­­реестрэм и ГъэIорышIапIэу Адыгэ Республикэм щыIэм ипа­щэу Марина Никифоровам.
Программэм ухэлэжьэным пае мы къыкIэ­лъыкIохэрэр пшIэнхэ фае:

1. ЦIыф псэупIэм игъунапкъэхэм къапэблагъэу щытын фае товари­ществэр.
2. ЦIыф псэупIэм газыр ащ ыпэкIэ ращэлIагъэу щытын фае. Шъо­лъырхэм яхэбзэ къулы­къу­хэм гъэстыныпхъэ шхъуан­тIэр зэраIэкIа­гъэхьащтым играфик зэхагъэуцо.

Пстэуми апэу чIыгу Iахьым ит унэр ежь цIыфым иунаеу зэрэщытыр къэзыгъэшъыпкъэ­жьырэ тхылъхэр иIэнхэ фае.
Чъыгхатэм зи зыщымыпсэурэ унэ цIыкIу горэ ит хъумэ, Урысые Федерацием и Правительствэ иунашъоу N 47-р зытетэу 2006-рэ илъэсым щылэ мазэм и 28-м къыдэкIыгъэм диштэу а унэр цIыфхэр зыщы­псэухэрэ унэу ышIыжьын фае.
ЗыгорэкIэ чIыгу Iахьыр зэриер къэзыушыхьатырэ фитыныгъэ чIыгулэжьым имыIэ хъу­мэ, 2031-рэ илъэсым гъэтхапэм и 1-м нэс ыпкIэ хэмылъэу ­иунаеу ар ышIыжьын ылъэ­кIыщт. АщкIэ къызыпкъырыкIын фаер федеральнэ законэу N 137-р зытетэу 2001-рэ илъэсым чъэпыогъум и 25-м къыдэкIыгъэм ия 3-рэ статья ия 2.7-рэ пункт ары.
Ащ нэужым СНТ-м хахьэхэрэм язэIукIэ зэхащэн фае, а чIыпIэм ит унэхэу цIыфхэр зы­щыпсэухэрэм гъэстыныпхъэр газыр аIэкIэгъэхьэгъэным ехьы­лIэгъэ унашъор ащ щаштэ.
ГазрыкIопIэ хъытыур щагъэ­псыным пае СНТ-м къыхиубы­тэрэ чIыгу Iахьэу зэкIэми зэдыряеу щытыр ыпкIэ хэмылъэу аратыным иIофыгъо тегущыIэнхэ фае.

ЧIычIэгъ псэуалъэхэу газым епхыгъэхэр агъэфедэнхэм пае зэкIэми зэдыряе чIыгур (ащкIэ фитыныгъэхэм япхыгъэ тхылъхэр бгъэхьазырынхэр имыщыкIагъэу) араты.
ИкIэухым цIыфхэр зыщы­псэухэрэ унэхэм гъэстыныпхъэ шхъуантIэр ящэлIэгъэным фэгъэхьыгъэ лъэIу тхылъэу аратыгъэмкIэ зэзэгъыныгъэ зэ­да­шIы. Ар чIыгур зиунаем иза­къоу щымытэу, товариществэм хэтхэм лIыкIоу агъэнэфагъэм ыцIэкIи а Iофыр зэшIуахын алъэкIыщт. Методическэ тхы­лъэу къыдэкIыгъэм сыд фэдэрэ лъэныкъомкIи къызфагъэфедэн алъэкIыщт шIыкIэхэр къыщепчъых.
Шъугу къэтэгъэкIыжьы: 2021-рэ илъэсым УФ-м и Президент ипшъэрылъ тетэу Правительствэр социальнэ гази­фикацием ипрограммэ пхыращыным ыуж ихьэгъагъ. Ащ ишIуагъэкIэ Урысыем щыпсэурэ цIыфхэм амал яIэ хъугъэ ячIыгу Iахьхэм ягъунапкъэхэм ыпкIэ хэмылъэу а гъэстынып­хъэр аращэлIэнэу. 2024-рэ илъэсым мэлылъфэгъум УФ-м и Правительствэ и Тхьаматэу Михаил Мишустиныр кIэтхэжьыгъ социальнэ газификацием ипрограммэ чъыгхатэхэр зылэжьхэрэри къыхегъэубытэгъэнхэмкIэ унашъом.
Сурэтхэр: Межрегионгаз.