ЩыIэныгъэм ылъапсэр Iофыр ары, цIыфым ыгу ащ зэрэфакIоу, зэрэлажьэрэм бэ елъытыгъэр, шIэгъэхэ Iофым уегъэгушIожьы.

Урысыем и Почтэ и Мафэ ехъулIэу Мыекъуапэ дэт почтэ къутэмабэм ащыщэу N 8-м, урамэу 12 Марта, 155-м тет унэм тыщыIагъ, лэжьэкIо купым ипащэу Мукоида Татьяна Виктор ыпхъум гущыIэгъу тыфэ­хъугъ.
Щыгъуазэ тызэрэхъугъэмкIэ, мы почтэ къутамэм ипащэу илъэс 35-м ехъугъэу связым Iоф щешIэ. «ТапэкIэ, — къеIуатэ ащ, — мы тиIофшIапIэ, урамэу Западнэм ермэл чылысым дэжь, тетыгъ, 2006-рэ илъэсым ащ тыкъикIыжьи, мыщ тыкъэкIо­жьыгъ. Апэ унэу джы Iоф
зыщытшIэрэр бэджэндэу тIыгъыгъ, илъэситIу хъугъэу къэт­щэфыжьыгъ, нахь гупсэфыпIи хъугъэ».
Татьянэ зипэщэ коллективыр пстэумкIи нэбгырэ 13 зэрэ­хъурэр: 7-р — почтальоных, 3-р — операторых, зыр пащэм игуадз ыкIи ежь пащэр, гъэкъэ­бзакIор ары.

ИIоф зэрикIасэр къыхэщэу Татьянэ къеIуатэ: «Тыгъуасэм фэдэу сынэгу кIэт мы унакIэм тыкъызэрэкощыжьыгъагъэр; тIэ­шъхьэ-лъашъхьэхэр дэщэягъэ­хэу, тиIофышIэхэм зэкIэми тытхьакIэу, тылъакIэу ыкIи ты­гушIоу зэпэжъыужьэу зэкIэ дгъэкъабзи, зызэIутхи, тиIофшIэн чIыпIакIэм нахьышIум тыщыгугъэу щедгъэжьагъ. Почтэ зэпхы­ныгъэ IофшIэныр къызэрыкIо дэдэу бэмэ къащэхъу, ау ащи кIуачIи акъыли бэу хэхьэ. Тэ мафэ къэс къэлэдэсхэр къытфэкIох, ахэм яфэIо-фашIэхэр зэкIэ афэтэгъэцакIэх: посылкэхэр, бандерольхэр, ахъщэхэр зыфэе чIыпIэу къаIорэм УрысыемкIэ ыкIи IэкIыб къэралхэмкIэ афэтэтIупщых; джащ фэд, нэмыкI чIыпIэхэм къарыкIыхэрэр тицIыфхэм ятэтыжьых. Письмэхэри, ыпэкIэ фэдэу мыбэхэми, мэзекIох, телеграммэхэри тэтIупщых. Коммунальнэ фэIо-фа­шIэхэм ауаси мыщ бэмэ щаты. Гъэзет ыкIи журнал зэфэшъхьафыбэ къытфэкIо, ахэр цIыфхэм ащэфых, акIэтхэх. Лотерее зэ­фэшъхьафхэм ящэни тиIофшIэн щыщ, страховкэхэр агъэхьазырынхэмкIи тадэIэпыIэ.
ТиIофшIэн пчъагъэу зэхэлъ: мары гъомылэпхъэ зэфэшъхьафхэр, IэшIу-IушIу гъэпкIа­гъэхэр ыкIи ащ нахь IудзыгъаIоу зэрыгыкIэхэрэ порошокхэр, сабынхэр, цэлъэкIхэр ыкIи нэгущыфэхэр, шампуньхэр бэу мэкIайхэм ащызэпэIутых — ахэри тщэнхэ фае. ЗэкIэ тшIэрэ Iофэу, дгъэцэкIэрэ лъэныкъо пэпчъкIэ осапкIэ къаIэтэхы, ащкIэ план ин тиI.
— ПланкIэ ащ фэдэу шъолажьэмэ, амалэу щыIэр зэкIэ къыдэшъулъытэнышъ, щыкIэрэ тIэкIур зэрижъугъэкъущтым лъэшэу шъунаIэ тежъугъэтын фае, — есэIо, ежь бзылъфы­гъэми къыздырегъаштэ.
ЦIыфыбэ къычIэхьэ, ау гущыIэ макъэ почтэм чIэIукIырэп, коллективым зэгурыIо-зэде­Iэжьныгъэ зэрэхэлъыр къапшIэу, хэти епIожьын имыщыкIагъэу иIоф егъэцакIэ. Мары нэбгырэ зыбгъу-зыпшIэу щытыр нэрэ-Iэрэм операторым къыIуитIупщыгъэх; пенсионерхэу ахъщэм къылъыкIохэрэри псынкIэу ашIэ­жьыгъэхэу IуатIупщых. Джащ фэд, пчыхьапэм къыIухьэгъэ машинэ ушъагъэри, нэбгырэ зытIоу чIэкIыхи, аунэкIэу ра­гъэжьагъ.

— IофшIэпIэ чIыпIэр тиколлективкIэ тиунэм фэд, — къе­Iуатэ Татьянэ, — тигумэкIи ти­гушIуагъуи зэдэтэIэты. Iофэу тшIэрэр тикIас, тесагъэу тегугъоу тэгъэцакIэ, тшIагъэми тыкIэгушIужьэу бэрэ къыхэкIы.
— ШъуиIофшIагъэкIэ шъуакъыхэща, шъуа­гъашIуа?
— ТиIофшIэн тегугъу, щытхъум тежэу сфэIощтэп, ар къы­зыпкъырыкIырэр нахь лъагэу щыт къэралыгъо Iэшъхьэтетхэр ары. Ау Почтэм и МафэкIэ щытхъу тхылъхэр, дипломхэр, нэмыкI нэпэеплъ шIухьафтынхэр къэзылэжьыгъэхэм — «Iоф­шIэным иветеран» зыфиIорэр къызэратыгъэхэм сащыщ, — еIо пащэм.
Мэкъуогъум и 20-м къалэу Ростов-на-Дону почтэ зэпхыныгъэмкIэ щыкIогъэ зэнэкъокъум мы къутамэм иIофышIэу Мацакян Ритэ хэлэжьагъ, иIоф хэшIыкIэу фыриIэр къыщигъэлъэгъуагъ.
Мыекъуапэ дэт почтэ къутэмэ пчъагъэм зэу мыр ащыщ, щылэжьэрэ коллективыр теубытэгъэ-шъыпкъагъэ хэлъэу Iофэу ышIэрэм зэрэпэгъокIырэм, зэрэдэлажьэрэм уеджэнджэшыжьынэу щытэп: зэде­Iэжьых, зэгурэIох, зэфэсакъы­жьых. КъяуалIэхэрэм цIыфыгъэ, Iэдэб ахэлъэу апэгъокIых, ащ фэдэу цIыфхэри къафыщытых. ЯмэфэкI мафэкIэ тафэлъаIо псауныгъэ пытэ яIэнэу, яму­радхэр къадэхъунхэу, япшъэ­рылъхэр щытхъу хэлъэу зэшIуа­хынхэу.
Мамырыкъо Нуриет.
Сурэтхэр: Iэшъынэ Аслъан.