Урысыем и Следственнэ комитет Адыгэ РеспубликэмкIэ иследственнэ гъэIорышIапIэ иотделэу мэхьанэшхо зиIэ Iофыгъохэм ахаплъэрэм зэгъэшIужь хьыкумышIыщтыгъэу Урысые Федерацием и Уголовнэ кодекс ия 290-рэ статья ия 4-рэ Iахь зигугъу къышIырэ бзэджэшIагъэ зезыхьагъэм (Урысые Федерацием ишъолъыр икъэралыгъо IэнатIэ ыIыгъызэ къуалъхьэ зыштагъэм) къы­фызэIуахыгъэ уголовнэ Iофым изэхэфын ыухыгъ.

Урысые Федерацием ихьыкумышIхэм я Апшъэрэ квалификационнэ коллегие Iизын къызырет нэуж Уры­сые Федерацием и Следственнэ комитет итхьама­тэ уголовнэ Iофыр къы­зэIуихыгъ.
ЫпэкIэ макъэ къызэрагъэIугъагъэу, гъогурыкIонымкIэ шапхъэхэр зыу­къогъэ, административнэ хэбзэукъоныгъэ зышIыгъэ водителым фэгъэхьыгъэ административнэ мате­риалым хаплъэзэ, зэгъэшIужь хьыкумышIым ыгу къэкIыгъ хэбзэукъоныгъэ зышIыгъэм къуалъхьэ къы­Iихынэу. Сомэ мини 5 хъурэ административнэ тазыр зэрагъэтын е мэзи 4-м щегъэжьагъэу мэзи 6-м нэс транспортыр зэрифэн фимытэу ашIын алъэкIыщтыгъэ водителым ащ риIуагъ зызэгурыIо­хэкIэ правэр Iамыхыным, нэмыкI пщыныжь рагъэ­хьыным ехьылIэгъэ унашъо зэриштэщтыр.
2023-рэ илъэсым гъэтхапэм и 29-м икабинет исыгъэ водителым ащ фигъэпытагъ унашъор хэ­бзэнчъэу зэриштагъэм пае сомэ мин 30 къыритынэу.
Урысыем щынэгъон­чъэнымкIэ и Федеральнэ къулыкъу Адыгэ Респуб­ликэмкIэ и ГъэIорышIапIэ иоперативнэ IофышIэхэм хьыкумышIыр аубытыгъ. Ар иунэ икIын фимытэу ашIыгъ. Уголовнэ Iофымрэ Адыгэ Республикэм ипрокурор изэфэхьысыжьрэ хьыкумым IэкIагъэхьагъэх.