Адыгеим щыпсэухэрэм чэщ-зымафэм гъогогъу 450-м нэсэу IэпыIэгъу псынкIэм зыфагъазэ хъугъэ. Анахьэу уз гъэтIылъыгъэ зиIэхэр ыкIи тыгъэр, фабэр къызэгоуагъэхэр ары гумэкIыгъо хафэхэрэр.

Медицинэ IэпыIэгъу псынкIэм и Адыгэ республикэ станцие ыкIи ошIэ-дэмышIэ тхьамыкIагъохэмкIэ медицинэ Гупчэм яврач шъхьаIэу Сихъу Ахьмэд къызэрэтфиIотагъэмкIэ, мафэ къэс дэкIыгъо 400 фэдиз ашIыщтыгъэмэ, мы мэфэ жъоркъхэм ахэр 450-м нэсых.
— Тызхэт лъэхъанымкIэ мы дэкIыгъо пчъагъэр бэп, ау ахэм яушъхьагъухэр зэхъокIыгъэх ыкIи узэу цIыфхэр зыгъэгумэкIыхэрэм къахэхъуагъ. Фэбэшхор зэкIэми къякIурэп. Анахьэу зыфэмыщэчыхэрэр гу-лъы­нтфэ ыкIи нервэ узхэр зиIэхэр ары — уз гъэтIылъы­гъэу яIэхэр къэбырсырых. ГущыIэм пае, инфаркт е инсульт иIэу зэгуцафэхэу илъэс реным чэщ-зымафэм зы нэбгырэ е тIу къыхэкIы­щ­тыгъэмэ, джы гъэмафэм нэбгырэ тфырытф хъугъэ. Джащ фэдэу псым ытхьэлагъэхэм япхыгъэу тидэкIыгъохэр бэ хъугъэ. Зы мазэм ныбжь зиIэ нэбгыри 2 ыкIи зы кIэлэцIыкIу псым ытхьэ­лагъэх. Фабэр ыкIи тыгъэр къяуагъэу чэщ-зымафэм дэкIыгъуи 2—3 тимыIэу къы­хэкIырэп, — хигъэунэфы­кIыгъ Сихъу Ахьмэд.
ТигущыIэгъу къызэрэхигъэщыгъэмкIэ, мэфэ фабэхэм лъэу цIыфым кIэтыр нахь Iужъу мэхъушъ, ар нахь пIуакIэ зэрэхъужьыщтым упылъын фае, ащ пае Iэзэгъу уцхэм уяшъонэу щыт. Ащ дакIоу псы бэу уе­шъон, тыгъэм ущызыухъумэрэ пкъыгъохэр бгъэфедэнхэ фае. Псы­хъом, бассейнхэм, псыубытыпIэхэм кIохэрэм сакъыныгъэ къызхэжъугъаф. Мэфэ фабэхэм анахьэу ащыгушIукIыхэу, ашIыгъэкIэ фонтанхэм чъыIэтэгъэ гуапэр къащызыубытхэрэр кIэлэцIыкIухэр арых. Ау ари ябгъа­шIэ зэрэмыхъущтыр ны-тыхэм зэхашIыкIын, пэрыохъу афэхъун­хэ фае.
Ом изытет игугъу къэтшIымэ, мэфэ фабэхэр джыри шIэхэу зэкIэкIощтхэп. ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэритыгъэмкIэ, мы тхьамафэм фабэр градус 34 — 35-м анэсыщт, къихьащт тхьамафэм — градус 36 — 38-рэ фэдиз, чэщым – градус 15 — 20 щы­Iэщт. Жьыбгъэр нэгъэупIэпIэ­гъум метрэ 15 — 18-м илъэшыгъэ зыщынэсыщт мафэхэр къыхэкIыщтых.
Бэдзэогъум жьы фэбэ гъу­шъэр Гурыт Азием къикIыщт. ГурытымкIэ мазэм температурэу щыIэщтыр шапхъэхэм афэдизыщт, ощхэу къещхыщтым ибагъэ шапхъэхэм анахь мэ­кIэщт. Мазэм къыкIоцI пчыхьэшъхьапэхэм ощх тIэкIу къыз-­
щещхыщт чIыпIэхэр къыхэ­кIыщт.
Iэшъынэ Сусан.