Адыгэ Республикэм и ЛIышъхьэу КъумпIыл Мурат зэрищэгъэ зэIукIэм хэушъхьафыкIыгъэу анаIэ зыщытырагъэтыгъэр къуа­джэхэм адэлъ щыIакIэм зыкъе­гъэIэтыгъэным иIофыгъохэр ары.

Къэралыгъо программэу «Къоджэ псэупIэхэм хэхъоныгъэ ягъэшIыгъэныр» зыфиIорэр а гухэлъым ипхырыщынкIэ амалышIоу щыт. Республикэм ар гъэхъагъэ хэлъэу щагъэцакIэ, къоджэдэсхэм ящыIакIэ нахь Iэрыфэгъу зэрэхъущтым епхыгъэ Iофтхьабзэхэр зэшIуахых. Мы илъэсым Красногвардейскэ ыкIи Мыекъопэ районхэр а программэм хэлажьэх. АР-м и ЛIышъхьэ пшъэрылъ къафишIыгъ илъэсэу къихьащтым программэм къыхиубытэщтхэм япхыгъэ тхылъхэр зэкIэ тэрэзэу къагъэхьазырынхэу.
АР-м мэкъу-мэщымкIэ имини­стрэу Къуанэ Анзаур лъэныкъо заулэхэмкIэ Iофэу зэшIохыгъэн фаехэм къатегущыIагъ. Ахэр зэпхыгъэхэр къоджэ псэупIэхэр лъэхъаным диштэу шIыгъэнхэр, цIыфхэм псэунхэмкIэ амалэу яIэхэм нахь зыкъягъэIэтыгъэныр, къуаджэм Iоф щызышIэщт цIыфхэр гъэхьазырыгъэнхэр ыкIи нэмыкIхэр. Муниципалитети 3-мэ: Кощхьэблэ, Шэуджэн ыкIи Джэджэ районхэм псэ­уалъэхэр ащышIыгъэнхэмкIэ, гъэцэкIэжьыгъэнхэмкIэ ыкIи зэтегъэпсыхьэгъэнхэмкIэ лъэIу тхылъи 3-мэ пэшIорыгъэшъэу адырагъэштагъ, ахэр илъэсэу къихьащтым зэшIуахыщтых.
Муниципалитетхэм илъэсэу къихьащтым гъогуи 3-мэ яIахь гъэнэфагъэхэр агъэцэкIэжьыщтых, социальнэ наймэм тетэу цIыфхэр зычIэсыхэрэ унэ 14 къуа­джэхэм ащашIыщт ыкIи цIыфхэм атырагощэщт.
«Къуаджэхэр нахь зэтегъэпсыхьэгъэн­хэр, специалистхэм зычIэсыщтхэ унэхэмкIэ сертификатхэр ыкIи къуа­джэхэм Iоф ащызышIэщтхэм яегъэ­джэнкIэ субсидиехэр аIэкэгъэхьэ­гъэнхэр – ахэр гугъэпIэ инхэр зэрапхырэ лъэныкъоу щытых. Къуаджэхэм Iоф ащызышIэщтхэр нахьыбэу къящэлIэгъэнхэм ыкIи ахэм къадэнэжьынхэм япхыгъэ Iофтхьабзэхэр зэшIохыгъэнхэ фае. Ащ тегъэпсыхьагъэу къэралыгъо IэпыIэгъум къытырэ амалхэри икъоу гъэфедэгъэнхэ фае, къэралыгъо программэм хэхьанхэм пае проект-сметэ документациер зэкIэ игъом мыгъэхьазырыгъэ хъущтэп», — къыхигъэщыгъ КъумпIыл Мурат.
Ащ нэужым АР-м мэкъу-мэщымкIэ иминистрэ къыIотагъ лэжьыгъэм иIухыжьын зэрэкIорэм фэгъэхьыгъэу. Мы лъэхъаным бжыхьасэхэм яIухыжьын ыкIэм фэкIо. ЧIыгу гектар мини 108-у бжыхьасэхэр зыхалъхьагъэхэм япроцент 99-р аIожьыгъах, зы гектарым гурытымкIэ хьэу къырахыжьыгъэр центнер 49-рэ, коцэу – центнер 49,9-рэ, рапсэу – центнер 20,1-рэ. Лэжьыгъэр зыIуахыжьырэ нэужым псынкIэу зэрахьан фэе Iоф­тхьабзэхэри зэшIуахынхэу пшъэрылъ афашIыгъ.
Гидротехническэ псэуалъэхэм язытет иIофыгъуи мы зэIукIэм щытегущыIагъэх. ПстэумкIи республикэм ащ фэдэ псэолъи 146-рэ ит, ахэм ащыщэу 46-р зыми фэгъэзагъэхэп. Ащ фэдэхэм янахьыбэр Мыекъопэ ыкIи Джэджэ районхэр ары зыдэщыIэхэр. Адыгеим и ЛIышъхьэ пшъэрылъ афишIыгъ а псэуалъэхэм ащыщхэр республикэ мылъкум хагъэ­хьанхэу. ЧIыпIэ зыгъэIорышIэжьыным икъулыкъухэм игъоу афалъэгъугъ зыми имые гидротехническэ псэуалъэхэр хабзэм къызэрэдилъытэрэм тетэу къулыкъу гъэнэфагъэхэм афэгъэзэгъэнхэмкIэ IофшIэныр лъагъэкIотэнэу. Джащ фэдэу муниципалитетхэм пшъэрылъ афашIыгъ мэз шъолъырхэм къахиубытэрэ чIыгухэр гощыгъэнхэмкIэ, бэджэндэу тыгъэнхэмкIэ ыкIи алъыплъэгъэнымкIэ шIыкIэ-амалэу щыIэхэр икъоу агъэунэфынхэу.

Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.