АР-м хэдзынхэмкIэ и Гупчэ комиссие зичэзыу я 45-рэ зэхэсыгъо иIагъ. Iофтхьабзэр зэрищагъ АР-м
хэдзынхэмкIэ и Гупчэ комиссие и Тхьаматэу Сэмэгу Нурбый.

Зэхэсыгъом хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, хэдзынхэмкIэ чIыпIэ комиссиехэм япащэхэмрэ ахэм ахэтхэмрэ. ЫпэрапшIэу агъэнэфэгъэ упчIитIу зэхэсыгъом щызэхафыгъ: АР-м хэдзынхэмкIэ и Гупчэ комиссие ирегламент зэхъокIыныгъэхэр фэшIыгъэн­хэмрэ АР-м и Къэралыгъо Совет — Хасэм къыгъэлъэгъогъэ политическэ партиехэм яIофшIэн телерадиокъэтынхэм уахътэу щаубытыгъэмрэ. Ахэм афэгъэ­хьыгъэу къэгущыIагъэх АР-м хэдзынхэмкIэ и Гупчэ комиссие и Тхьаматэ игуадзэу ХьацIэцIэ Фатимэрэ аппаратым испециалист-экспертэу Екатерина Дунаевскаямрэ. УпчIэхэм язэхэфын ыуж щытхъу тхылъхэм ятын зэIукIэгъур лъи­гъэкIотагъ. УФ-м и Президент ихэдзынхэм языфэгъэхьазырынрэ ярегъэ­кIокIынрэ чанэу хэлэжьагъэхэм АР-м и Къэралыгъо Совет — Хасэм ыкIи Урысыем хэдзынхэмкIэ и Гупчэ комиссие ятынхэр афагъэшъошагъэх. ПстэумкIэ республикэм щыпсэурэ нэбгырэ 40 фэдизмэ ахэр аратыжьыгъэх. Ащ ублапIэ фи­шIыгъ АР-м и Къэралыгъо Совет — Хасэм и Тхьаматэу Владимир Нарожнэм. Зэхэсыгъом къекIолIагъэхэм ащ ыпэрапшIэу шIуфэс къарихыгъ ыкIи АР-м хэдзынхэмкIэ и Гупчэ комиссие и Тхьаматэу Сэмэгу Нурбый имэфэкI мафэу блэкIыгъэмкIэ фэгушIуагъ. Нэужым Къэралыгъо Советым — Хасэм ищытхъу тхылъхэр зытефэу алъытагъэ­хэм аритыжьыгъэх.
— Урысыем и Президент ихэдзынхэр гумэкIыгъо къапымыкIэу Адыгеим зэрэщырекIокIыгъэхэр шъоры зихьатырыр. АР-м хэдзынхэмкIэ и Гупчэ комиссие иIофшIэн осэ инэу къэралыгъом къыщыфашIыгъэр къылэжьыгъэ дэдэу сэлъы­тэ, — къыIуагъ ащ

Урысыем хэдзынхэмкIэ и Гупчэ комиссие ирэзэныгъэ ыкIи ищытхъу тхылъхэр къэзылэжьыгъэхэм Сэмэгу Нурбый аритыжьыгъэх. Ахэм ащыщых кIэлэегъаджэхэу Урысые олимпиадэу «СОФИУМ» зыфиIорэм текIоныгъэ къыщыдэзыхыгъэ кIэлэеджакIохэу Татьяна Дорошенкэмрэ (Женя Поповым ыцIэ зыхьырэ лицееу N 8-р) Елизавета Логиновамрэ (Мыекъопэ гимназиеу ­N 22-р) зыгъэхьазырыгъэхэр.
Анцокъо Ирин.
Сурэтхэр: Артур Лаутеншлегер.