Сабый къэхъугъакIэхэм ныдэлъф узхэр яIэ-ямыIэр зэгъэшIэгъэным тегъэпсыхьэгъэ фэIо-фашIэхэм язэхэщэнкIэ хэбзэгъэуцугъэм къыдилъы­тэрэ шапхъэхэр Мыекъопэ къэлэ клиникэ сымэджэщым зэригъэцакIэхэрэмкIэ Урысыем монополием пэшIуекIогъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ зимычэзыу уплъэкIун зэхищагъ.

Аукционыр зэрэзэхащагъэм иуплъэкIун лъапсэ фэхъугъэр зэзэгъыныгъэ системэм ехьылIэгъэ хэбзэгъэуцугъэр заказчикым ыукъуагъэмэ зэригъэшIэнэу общественнэ уплъэкIунхэр зэхэзыщэрэ ассоциацием монополием пэшIуекIорэ къулыкъум зыкъызэрэфигъэ­загъэр ары.
«Ассоциацием монополием пэшIуекIорэ къулыкъум риIуагъ пIалъэу агъэнэфагъэхэр ыукъохэзэ заказчикым план-графикым зэхъокIыныгъэхэр зэрэфишIыгъэхэр», — къытыгъ ведомствэм ипресс-къу­лыкъу.
Сабый къэхъугъакIэхэм ныдэлъф узхэр яIэ-ямыIэмкIэ уплъэкIунхэр 2024-рэ илъэсым ыкIэ нэс зышIынхэу зэзэгъыгъэхэр Краснодар дэт край клиникэ сымэджэщэу С. В. Очаповскэм ыцIэ зыхьырэр ары.
«Урысыем монополием пэшIуекIогъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ икомиссие зыкъызэрэфагъэзагъэм лъапсэ иIэу ылъытагъ. Мыекъопэ къэлэ клиникэ сымэджэщым иIофышIэу хэукъоныгъэ зышIыгъэм административнэ пшъэдэкIыжь рагъэхьыщт», — къытыгъ ведомствэм ипресс-къулыкъу.