Мыекъуапэ дэт православнэ чылысым терактэу щызэрахьанэу щытыгъэр ФСБ-м ыкIуачIэхэм къадагъэхъугъэп. Гурыт Азием къикIыгъэр зыфэягъэр чылысым иIофышIэхэмрэ къэрэгъулхэмрэ ыукIынхэшъ, унэр ыгъэстыжьыныр ары. Ащ фэгъэхьыгъэу къытыгъ ФСБ-м цIыфхэм къэбарыр алъыгъэIэсыгъэнымкIэ и Гупчэ.
«Урысые Федерацием щынэгъончъэнымкIэ и Федеральнэ къулыкъу террористическэ Iофтхьабзэу Гупчэ-Азиатскэ шъолъырым ихэгъэгухэм ащыщ горэм къикIыгъэм, Урысыем щамыдэрэ дунэе террористическэ организацием хэтым, игухэлъ къыдигъэхъугъэп», — къыщеIо Гупчэм къытыгъэм.
Терактыр зэрихьаным ыпэкIэ ащ чIыпIэм дэгъоу нэIуасэ зыфишIыгъ, схемэр зэхигъэуцуагъ, ищыкIэ­гъэщт пкъыгъохэр зэригъэгъотыгъэх ыкIи къэон зылъэ­кIыщт пкъыгъо гъэнэфагъэр ежь-ежьырэу ышIыгъ.
Ащ нэужым «МТО-м игухэлъхэр цIыфхэм нахь игъэкIотыгъэу алъигъэIэсынхэм пае» терактыр камерэм тыритхэнэу фэягъ, нэужым интернетым къыригъэхьаным пае. Игухэлъ зигъэцэкIэрэ нэужым IэкIыб къэрал горэм зыщигъэбылъыжьынэу арыгъэ.