Гъогу транспорт хъугъэ-шIа­гъэхэр, кIэлэцIыкIу фыкъоны­гъэхэр нахь макIэ шIыгъэнхэм, гъогурыкIоным хэлажьэхэрэм шъхьэкIэфэныгъэ зэфыряIэным афэIорышIэщт пэшIорыгъэшъ Iофтхьабзэу «Мото-Вело-Сим» зыфиIорэр бэдзэогъум и 11-м къы­щегъэжьагъэу и 14-м нэс рес­пуликэм щыкIощт.

2024-рэ илъэсым бэдзэогъум и 10-м ехъулIэу тишъолъыр игъогухэм хъугъэ­-шIэгъи 194-рэ къатехъухьагъ. Ахэм нэбгырэ 43-рэ ахэкIодагъ, 212-мэ шъобж зэфэшъхьафхэр хахыгъэх. Анахь гумэкIыгъо къызпыкIыхэрэм ащыщ кIэлэцIыкIухэу мото-велотранспортыр, СИМ-р зезыфэхэрэр.
Зигугъу къэтшIыгъэ транспорт амалхэр зезыфэхэрэм гъогурыкIоным ишапхъэу аукъохэрэм алъапсэр агъэунэфын, нэмыкI шапхъэхэм алъэныкъокIэ укъоныгъэу зэрахьэхэрэр къыхэгъэщыгъэнхэм гъогу патруль къулыкъум ихэушъхьафыкIыгъэ батальон иинспекторхэм яIофшIэн фагъэIорышIэщт. Зыухъумэхэрэ пкъыгъо­хэр зэрагъэфедэрэр ауплъэкIущт. Ащ дакIоу, ныбжьыкIэхэм ащ фэдэ транспорт амалхэр зэрагъэфедэнхэ фаем пылъ шапхъэхэр къафаIотэщтых.

ЛIыунэе Тимур.
Гъогу-патруль къулыкъум ихэушъхьафыкIыгъэ батальон иротэу N 1-м икомандир, полицием имайор.
Сурэтыр: хэушъхьафыкIыгъэ батальоным иротэу N 1-р