Унагъом имэхьанэ агъэлъэшэу
Унагъом и Илъэс фэгъэхьыгъэ арт-объект Мыекъопэ районым къыщызэIуахыгъ. ЧIыпIэ фэхъугъэр Абдзэхэхьаблэ игурыт еджапI.
Илъэс пчъагъэхэм дэпкъ нэкIэу щытыгъэм унагъом, ащ изыкIыныгъэ, зэныбджэгъуныгъэм, зэгурыIоныгъэм, лъэпкъ зэфэшъхьафхэм язэныбджэгъуныгъэ ыкIи чIыпIэ хъопсапIэхэр къизгъэлъэгъукIрэ сурэтхэр атырашIыхьагъэх. Гъэмэфэ зыгъэпсэфыгъоу тефагъ нахь мышIэми, яеджапIэ щыхъугъэ зэхъокIыныгъэр зэрагъэлъэгъунэу кIэлэцIыкIубэ къекIолIагъ ыкIи сурэтхэр агу рихьы-
гъэх.
— Сурэтхэр иных, дахэх, зэмышъогъух. Нэр агъэгушIо. Ау ахэм мэхьэнэ куухэр ахэлъых. Унагъор хэткIи шъхьаIэ. Зэныбджэгъуныгъэри, зэгурыIоныгъэри ары. Ахэр сурэтхэм тщагъэгъупшэщтэп, — еIо Абдзэхэхьаблэ игурыт еджапIэу N 3-м икIэлэеджакIоу Анаида Лезгановам.
Унагъом и Илъэс фэгъэхьыгъэ мыщ фэдэ арт-объектхэм якъызэIухын зигукъэкIыр мысатыушI организациеу «Талантида» зыфиIорэр ары. «Движение первых» зыфиIорэм иIэпыIэгъукIэ ар гъэцэкIагъэ хъугъэ. Ащ зэхищэгъэ зэнэкъокъум арт-объектхэм яшIынкIэ проектыр хэлэжьагъ ыкIи текIоныгъэр къыщыдихыгъ. Сурэтхэм яшIын сурэтышIхэмрэ волонтерхэмрэ хэлажьэх.
— Унагъом, шIулъэгъум, шъыпкъэныгъэм я Мафэ пэблагъэу арт-объектым икъызэIухын ау сыдми тедгъэфагъэп. Сурэтэу тшIыгъэхэм ары ямэхьанэ шъхьаIэр, ащкIэ ар дгъэлъэшы тшIоигъуагъ. Дэпкьым тешIыхьагъэхэм зэкIэми агузэгу итыр унагъор ары. ЦIыф пэпчъыкIи ищыIэныгъэ ары зэрэщытын фаер: иунагъо чIыпIэ шъхьаIэр ыIыгъын фае, адырэ пстэур ащ къешIэкIыгъ. Арышъ, гупшысэ шъхьаIэу мыщ хэлъыр — пстэури унагъом къыщежьэ, — еIо проектыр зигукъэкIэу, мысатыушI организациеу «Талантидэм» ипащэу Карен Каракьян.
Абдзэхэхьаблэ игурыт еджапIэ къыщызэIуахыгъэ арт-объектыр ятIонэр. Апэрэр къуаджэу Тэхъутэмыкъуае щагъэпсыгъ. Хэгъэгу зэошхом илъэхъан Советскэ Союзым и ЛIыхъужъыцIэ къызфагъэшъошэгъэ тилъэпкъэгъухэм афэгъэхьыгъэр В. КI. Мызэгъым ыцIэ зыхьырэ еджапIэм щагъэпсыгъ. Проектым икIэщакIохэм республикэм ирайонхэмрэ икъалэхэмрэ къызэлъаубытыныр ягухэлъ. ПстэумкIи арт-объекти 9 ащ къыдыхэлъытагъ. Зичэзыур, я 3-р, Мыекъуапэ игурыт еджапIэу N 6-м щашIыщт. ЗэхэщакIохэм къызэраIуагъэмкIэ, адыгэ лъэпкъ нэшанэ ащ хэлъыщт.
Анцокъо Ирин.
Сурэтхэр: Iэшъынэ Аслъан.