Мыщ фэдэ цIэ зиIэ федеральнэ проектэу Адыгеим щагъэцакIэрэр ыкIэм нагъэсыным пае мы илъэсым сомэ миллиони 161,9-рэ зытефэщт IофшIэнхэр рагъэкIокIыщтых.

Адыгеим псэолъэшIынымкIэ и Министерствэ къызэритырэмкIэ, лъэпкъ проектэу «ПсэупIэр ыкIи къэлэ щыIакIэр» зыфиIорэм хэхьэрэ федеральнэ проектэу «Псы къабзэм» республикэм имуни­ципальнэ псэупIэхэр 2019-рэ илъэсым къыщыублагъэу хэлажьэх, а уахътэм пэIуагъэхьагъэр зэкIэмкIи сомэ мил­лион 765-рэ.Федеральнэ проектыр УФ-м и Президент иунашъоу «Урысые Федерацием 2024-рэ илъэсым нэс хэхъоныгъэ ышIынымкIэ лъэпкъ мурадхэмрэ охътэ чыжьэ пшъэрылъхэмрэ» зыфиIорэм тегъэпсыхьагъэу пхыращы.
Шъугу къэдгъэкIыжьын, проектым ипшъэрылъ шъхьаIэр — цIыфхэм аIэкIэхьэрэ зашъохэрэ псым идэгъугъэ зыкъегъэIэтыгъэным пае псырыкIуапIэхэмрэ псыкъэтыпIэмрэ гъэкIэжьыгъэн­хэр ыкIи технологие пэрытхэм адегъэ­штэгъэнхэр.
— 2019-рэ илъэсым къыщыублагъэу 2023-м нэс Адыгеим имуниципальнэ псэупIэхэм псым икъещэлIэн тегъэ­псыхьэгъэ объект 27-рэ ащашIыгъ. 2024-рэ илъэсым ыкIэ нэс зэкIэмкIи шIыгъэн ыкIи гъэцэкIэжьыгъэн фаеу объект 33-рэ проектымкIэ агъэнэфэгъагъ, — къы­Iотагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан.
2023-рэ илъэсым ыкIэ ехъулIэу проектыр зэрагъэцэкIагъэм изэфэхьысыжьхэмкIэ, Адыгеир шъолъыр пэрытхэм ахэхьэ: илъэситф пIэлъэ IофшIэнхэр процентишъэу щагъэцэкIагъ.
ПсэолъэшIынымкIэ Министерствэм къызэрэщытаIуагъэмкIэ, мы илъэсымкIэ проектым къыдилъытэрэ IофшIэнхэр процент 45-кIэ зэкIафагъэх.
МыгъэкIэ зэраухэсыгъэу, республикэм ирайонищмэ – Тэхъутэмыкъое, Теуцожь ыкIи Джэджэ районхэм – псым итын тегъэпсыхьэгъэ объектих ащашIы ыкIи ащагъэцэкIэжьы. ГущыIэм пае, Тэхъутэмыкъое чIыпIэ коим хэхьэрэ Натыхъуа­ерэ псэупIэу Отраднэмрэ япсыкъычIэщыпIитIу агъэкIэжьы, IофшIэнхэм сомэ миллион 22,5-рэ ыкIи миллион 22,8-рэ атефэщт.
Джащ фэдэу Теуцожь районым ипсэупIэхэм: Нэшъукъуае — сомэ миллион 15,1-рэ, Пэнэжьыкъуае – сомэ миллион 25,4-рэ ауасэу япсыкъычIэщыпIэхэр агъэкIэжьых. Лъэустэнхьаблэ кIэу щашIы, ащ тефэщтыр сомэ миллион 45,2-рэ.
Джэджэ районым псыкъычIэщыпIэ зэхэт сомэ миллион 30,9-рэ ыуасэу Дондуковскэм щагъэуцу.
— «Псы къабзэм» къыхиубытэу урамэу Октябрьскэм псыкъычIэщыпIэ щызэтырагъэпсыхьэ. IофшIэнхэр зэкIэ япIалъэм къыриубытэу зэшIуахых, — къыIуагъ Джэджэ районым ипащэу Андрей Таранухиным.
Ащ къызэрэхигъэщыгъэмкIэ, станицэм щыпсэухэрэм ящыIакIэ псыкъычIэщыпIакIэм ишIуагъэкIэ бэкIэ нахьышIу хъущт.
— ЧIыпIэм скважинитIу щытыубырыугъ, чэшъанэр ыкIи къулыкъушIэпIэ псэуалъэр зытетыщтхэ лъакъор дгъэчъы­гъэ, чырбыщ псэуалъэр зэтетлъхьагъ, чэур дгъэуцугъахэ, псыкъещэлIапIэмрэ псы тыпIэмрэ ярыкIуапIэхэр чIэтлъхьагъэх. ЧIыналъэм изэтегъэпсыхьан едгъэ­жьагъ – гъогуIудэхэр щытых, асфальтыр телъ, — къаIотагъ псэолъэшIхэм.
Дондуковскэ псыкъычIэщыпIэр мы илъэсым ишышъхьэIу мазэ иапэрэ мафэ къаухынэу агъэнафэ.
ПсэолъэшIынымкIэ Министерствэм къызэритырэмкIэ, Адыгеим щыпсэухэу гупчэ псыкъэтыпIэм епхыгъэхэу шэпхъэ­шIухэм адиштэрэ псыр къызIэкIахьэхэрэм япчъагъэ мы илъэсым ыкIэ нэс процент 92-м нэсынэу щыт.