ТIопсэ районым культу­рэмкIэ иIофышIэхэм ащыщ анахь спорт уна­гъокIэ алъытэрэр адыгэ къуаджэу къушъхьэм хэтым щэпсэу.

Хабзэ зэрэхъугъэу, унагъом и Илъэсэу Урысыем щагъэнэфагъэм фэгъэхьыгъэ зэнэкъокъухэр бэмышIэу псэупIэу Ныбыгъу дэт гъэпсэфыпIэу «Зорькэм» щыкIуагъэх. «Сят, сян, сэры — тыспортивнэ унагъу» зыфиIорэ зэнэ­къокъур зэхэзыщагъэр культурэм иIофышIэхэм япрофсоюз и ТIопсэ райком ары. Ащ командэ 11 хэлэжьагъ.
Муниципалитетым культурэмкIэ икъэлэ ыкIи икъоджэ учреждениехэм ялIыкIоу щыт унэгъо купхэр пэрыохъуныгъэхэр псынкIэу ыкIи къулайныгъэ хэлъэу щыгъэзые­гъэнхэм тегъэпсыхьэгъэ зэнэкъо­къум хэлэжьагъэх. Теннис зэре­шIэхэрэ ракеткэ цIыкIухэр аIыгъхэу, ахэм ателъ Iэгоо цIыкIу-
хэр къемыфэхынхэм фэсакъхэзэ псын­кIэу кIэлэцIыкIумэ къачъы­хьэщтыгъ, якъулайныгъэ къызэрагъэлъэгъощтым фытегъэпсыхьа­гъэу загъэпсыщтыгъ.
Анахьыбэу очко къэзыхьыгъэр къуаджэу Псыбэ щыщ Шъхьэлэхъо унагъор ары. ЯтIонэрэ чIыпIэр зыубытыгъэр район гъэзетэу «Чер­номорье сегодня» зыфиIорэм иредакцие илIыкIо куп. Джэрзыр — къалэу ТIуапсэ и Гупчэ тхылъеджапIэ щылэжьэрэ Игнатенко унагъор ары.
— Лъэшэу тигуапэ хъугъэ зыкIыныгъэ ахэлъэу осэшIхэми, цIыфхэу къекIолIагъэхэми Шъхьэлэхъо унагъор къазэрэхагъэщы­гъэр. Ахэр лъэшэу зэкъотхэу ушэ­тынхэр зэпачыгъэх, — къы­Iуагъ къуаджэу Псыбэ культурэм и Унэу дэтым ипащэу Ацумыжъ Маринэ. — Унагъом ышъхьэу Мурдин Рэмэзан ыкъом илъэс 19 хъугъэу культурэм и Унэ Iоф ще­шIэ. Ар IэпэIэсэныгъэ зыхэлъ къэшъуакIу, цIыфхэр жъугъэу зы­хэлэжьэхэрэ общественнэ ыкIи культурнэ Iофтхьэбзабэ зэрещэ. Ишъхьэгъусэу Заремэ Руслъан ыпхъур къуаджэу Псыбэ дэт еджа­пIэм ипащэ пIуныгъэ IофымкIэ игуадз. Япшъэшъэжъыеу Самирэ я 2-рэ классым ис, творчествэм лъэшэу фэщагъ. Илъэс заулэ хъу­гъэу къэшъокIо купэу «Псыбэм» хэт, дэгъоу орэд къеIо. Ащ нэ­мыкIэу япшъэшъэжъыеу Миланэ ышыпхъу нахьыжъ ыуж къимынэным пылъ. Илъэсищым къехъугъэп, ау нахьыжъым ышIэрэр зэкIэ кIешIыкIыжьы. Унэгъо ныбжьыкIэм тыфэлъаIо тапэкIи гъэхъагъэхэр ышIынхэу!