Адыгэ Республикэм зыщызэхэгущы­Iэжь­хэрэ Гупчэу иIэхэм зэIукIэ гъэшIэгъонхэр ащыкIуагъэх, ахэр зыфэгъэ­хьыгъагъэхэр культурнэ байны­гъэмрэ лIэужхэм язэпхыныгъэрэ.

ЗыщызэхэгущыIэжьхэрэ Гупчэу Джэ­джэ районым итым гъунэгъухэм я Дунэе мафэ щыхагъэунэфыкIыгъ. Районым культурэмкIэ и Унэ иIофышIэхэм викто­ринэу зэхащагъэм цIыфыбэ хэлэжьагъ: мэфэкIыр къызхэкIыгъэм фэгъэхьыгъэ упчIэм джэуапхэр къы­ратыжьыгъэх, художественнэ фильмхэм, ­лъэпкъ орэд­хэм, унагъом, унэм ыкIи гъунэгъухэм алъэныкъокIэ шIэныгъэу яIэхэмкIэ зэнэ­къокъугъэх. Мэфэ­кIым гуфэбэныгъэ, гъу­нэгъу зэфыщытыкIэ нэшанэ хэлъэу кIуагъэ.
Унагъом и Дунэе мафэ тефэу зыщызэхэгущы­Iэжьхэрэ Гупчэм программэу «Уасэ зиIэмэ зэкIэмэ апшъэ щыIэр: унагъор» зыфиIорэр щызэхащагъ. ТхылъеджапIэм ыкIи хъар­зынэщым яIофышIэ­хэр ары ащ изещэкIуагъэхэр, Адыгэ Республикэм щы­псэурэ унагъохэу зэлъа­шIагъэхэм нэIуасэ афа­шIыгъэх, джащ фэдэу адыгэ ыкIи къэзэкъ унагъохэм яшэн-хабзэхэр зы­фэдэхэр къаIотагъ.
Гупчэм ихьакIэмэ джыри зы зэIукIэ зэхащэнэу ушъхьагъу яIэ хъугъагъэ: Джэ­джэ ыкIи Мыекъопэ районхэм ащыщ цIыф пэрытхэм кIэлэцIыкIухэм якъэухъу­мэн и Мафэ те­фэу якъорэлъфхэр къы­рагъэблэгъагъэх.
Джэджэ районым кIэлэ­цIыкIумэ сэмэркъэу зы­хэлъ зэнэкъокъухэр, лъэныкъо зэфэшъхьафхэм-
кIэ мастер-классхэр афырагъэкIокIыгъэх. КIэлэ­цIыкIумэ бгъэ­халъхьэхэр шэ­кIым хашIыкIынхэу зэ­рагъэшIагъ, шIэныгъэ къя­зытырэ джэгукIэхэм ахэлэжьагъэх, ятэжъмэ орэдхэр къадаIуагъ, янэжъ­мэ щэламэхэр ада­гъэ­хьазырыгъэх.
ЗэхэгущыIэжьыным и Гупчэу Мые­къопэ районым итым къорэлъфхэу къы­рагъэблэгъагъэхэм концерт къафэзы­тыгъэхэр кIэлэцIыкIу ыкIи ныбжьыкIэ твор­чествэм и Гупчэ, джащ фэдэу искусствэхэмкIэ кIэлэцIыкIу еджапIэу по­селкэу Тульскэм дэтхэм ятворчествэ купхэр ары. Нэжъ-Iужъхэри сабыйхэри ягуапэу творческэ мастерскоим щы­зэхащэгъэ Iофтхьабзэ­хэм, асфальтым сурэтхэр тешIыхьэгъэнхэмкIэ зэнэ­къо­къум зэдыхэлэжьагъэх, нэужым ыпкIэ зыхэмылъ мороженэхэмкIэ ахэр пар­кым щахьакIагъэх.
Нахьыжъхэм язэхэгущы­Iэжь Гупчэхэм тематическэ зэIукIэхэр ыкIи лекциехэр экспертмэ ащы­зэхащэх, джащ фэдэу мастер-классхэр, экскурсиехэр, концертхэр ахэм ащэкIох. Шъугу къэдгъэ­кIы­жьын, Адыгэ Респуб­ликэм инахьыжъхэм язэ­хэгущыIэжь Гупчэу тIу ит, ахэм япрограммэ ясайт нэIуасэ шъущыфэ­хъун шъулъэкIыщт.
Гупчэхэм яадресхэр:
Станицэу Джаджэр, урамэу Кооперативнэр, 29-рэ;
Поселкэу Тульскэр, урамэу Первомайскэр, 161-рэ.