Ижъ-ижъыжьым, нарт къэбархэми бэрэ къахэфэ, ­адыгэмэ якъушъхьэ­хъухэм Лэгъо-Накъэ фэдэ чIыпIэхэм Iэ­хъогъубэхэр гъэма­фэрэ ащагъэхъущтыгъэх.

Чэм лъфагъэхэр ащыщтыгъэх, щэр агъапщтэщтыгъ, къуаер рахыщтыгъ, ахэр агъэгъущтыгъэх. Чэ­махъомэ аущтэу гъэщыр зэрахьан фаеу хъущтыгъ. Чэм зытIущмэ къа­кIащыгъэ щэ зэхэкIагъэхэр загъапщтэу, зыу­чъыIыжькIэ, щэтэшъхьэ Iужъу къытыредзэ. Пхъэпэ тIаркъор агъэчэрэгъузэ, а щэташъхьэр ащ пащы­хьэщтыгъ, жьау горэм ар щагъэгъущтыгъ. ЕтIани загъажъокIэ, а пхъапэм ятIонэрэ къатэу ращэкIыщтыгъ. Ари агъэгъущтыгъ. Аущтэу зытIо-зыщэ агъэгъузэ щэташъхьэр зыпылъ хъугъэ пхъэпэ тIаркъом «щэтэпхъап» раIорэр. Къушъхьэхъум къикIыжьырэ Iахъохэм мымакIэу къое гъугъэхэмрэ щэтэпхъапэхэмрэ къыздыра­хьыхыжьыщтыгъэх.

КIымафэрэ чэмхэр зыгъужьхэкIэ, щэр зыхакIэрэ е тхъухэр зыхалъхьэрэ шхыныгъохэм ахэр аха­гъэушкъуаещтыгъэх.
Щэтэпхъапэм шъоу тыракIэти, кIэлэцIыкIухэм аратыщтыгъ.
Ащ нахь мороженэ IэшIу мэхъужьа?!
Тэу Аслъан.
АР-м и Лъэпкъ музей иIофышI.