«Жъогъобыным» изичэзыу къыдэкIыгъо теплъэу иIэмкIи, дэтхэмкIи зэдештэ, уеджэнкIи гъэшIэгъоны.

Журналым ыкIышъо тет пшъэшъэ­жъые цIыкIоу дзэ шъуашэр зыщыгъыр Мыекъуапэ щыщ, кIэлэеджакIохэм азыфагу щыкIогъэ зэнэкъокъоу «Сыбзэ — сидунай» зыфиIорэм хэлэжьагъэу, илъэси 5 зыныбжь Хьаткъо Анет. Къызэгопхымэ, мэзым хэс псэушъхьэ зэ­фэшъхьафхэр, къэгъэгъэ шъофыр, хьэцIэ-пIэцIэ псынкIэхэр, анахьэу хьам­пIырашъо пкIырапкIынэхэр тэлъэгъух. Гъэ­мафэр зэрэтхъагъор мы нэкIубгъом къекIуатэ ыкIи ащ къыгот МэщбэшIэ Исхьакъ иусэу «ХьампIырашъом иорэд» зыфиIорэр.
«ЛIыхъужъым инэкIубгъо» къыщытыгъэ «Нэпэеплъ мыжъобгъу» зышъхьэр журналистэу Ныбэ Анзор ий. «ТекIоныгъэм и Маф» зыфиIорэ нэкIубгъоу ащ къыготыр кIэлэеджакIохэм ясурэтшIыгъэхэмкIэ гъэкIэрэкIагъэ. Ары, ТекIоныгъэр — анахь уасэрэ мэхьанэрэ зиIэ гъэ­хъэгъэшхоу хэтрэ цIыф лъэпкъкIи щыт ыкIи къэнэжьы.
Москва щыпсэурэ адыгэ бзылъфыгъэ тхакIоу Гъыщ Рахьмэт ирассказэу «Мыхьамодэ игухэкI» мыщ къыдэхьагъ. Ар художественнэ тхыгъэ IупкI, уцIы­кIуми уиными акъыл хэпхыщт. Адыгеим пэчыжьэу мэпсэуми, зыбзэ, зихабзэ сыдигъуи гукIэ зыIэкIэзымытIупщырэ Гъыщ Рахьмэт шъхьэкIафэ зыфыуе­гъэшIы.
Успенскэ районым ит къуаджэу Шъхьа­щэфыжь щыкIогъэ «Адыгэ пшъашъ» зыфиIорэ фестиваль-зэнэкъокъур IупкIэу къытхыжьыгъ Нэгъэрэкъо Саныет.
ТхакIоу ГутIэ Саныет ирассказ цIыкIоу «Асхьад ныбджэгъу зэригъотыгъэр» IупкIэгъэ-нэфагъэ, гулъытэ-гупшысэ икъу зыхэлъ, узеджэкIэ, уещэфы.
КIэлэцIыкIухэм ядунай амалэу щыIэ пстэумкIэ журналэу «Жъогъобыным» къыреIотыкIы ыкIи къырегъэлъэгъукIы. Спортыр кIэлэцIыкIухэмкIэ зэрэапэрэр къыщыIотагъ, щыкIэгъэтхъыгъ «Спорт­смен ныбжьыкI» зыфиIорэ тхыгъэу я 22-рэ Мыекъопэ гимназием иеджакIоу Тыгъужъ Алкъэс фэгъэхьыгъэу Бис­лъан­гъур Светэ къыгъэхьазырыгъэм.
«Жъогъобыным» чIыпIэ щиубытыгъ псэушъхьэхэм ядунай фэгъэхьыгъэм. Мыр къэзыгъэхьазырырэр мыбиологми, Къуанэ Гощпакъ, узфэмынэIосэгъэ пыжъхэм яхьылIэгъэ шIэныгъабэр зы­хэбгъуатэу щыт, адыгэбзэ къабзэкIэ тхыгъэ. КъыошIэкIыгъэ чIыопсыр нахь озыгъашIэу, узыгъэIушэу къысщыхъугъ.
Усэхэр зикIасэхэм афэтхагъэх ХьакIэмыз Сусанэрэ Нэхэе Симэрэ.
«Жъогъобыным» ихьакIагъ лъэпкъ культурэм иIофышIэу, къуаджэу Улапэ щызэхэщэгъэ кIэлэеджэкIо къэшъокIо купэу «Бэслъэнэим» ипащэу Уракъ За­ринэ. Ащ зэдэгущыIэгъур дэзышIыгъэр журналым иIофышIэу Дзыбэ Назрэт.
Журналым чIыпIэ хэхыгъэ щигъотыгъ «Пушкиным и Маф» ыIоу республикэ кIэлэцIыкIу тхылъеджапIэм иIофышIэу Къат Сусанэ къыгъэхьазырыгъэм.
НэкIубгъо 14 зэкIэмкIи кIэлэцIыкIу­хэм апае къыдэкIырэ «Жъогъобыным» ыубытырэр, ау нэкIубгъо пэпчъ зэфэшъхьаф: «Зымыгъэзэщ! Ор-орэу гъэлэжь!» зыфиIорэр якIас кIэлэцIыкIу IыгъыпIэм кIохэрэм, игъорыгъоу, аIи агуи еджэным екIуным тегъэпсыхьагъ. «Сканворд» нэкIубгъори хэти зыгъэгупшысэрэм ащыщ, ар илъэс пчъагъэхэм кIэлэпIоу Iоф зышIэгъэ Хьаудэкъо Сарэ къыгъэхьазырыгъ.
Журналым ренэу къоджэхь-къоджэшх­хэр, кIэлэцIыкIухэм яхьылIэгъэ къэбар щхэн цIыкIухэри «Тызэдэжъугъэщх!» ыIоу къехьэх.
Щэч хэлъэп кIэлэцIыкIу журналым иредакторэу Дзыбэ Назрэт егугъоу, ыгу факIоу, сыдигъуи Iоф зэришIырэм.
Шъугу къэзгъэкIыжьын, адыгабзэкIэ ыкIи урысыбзэкIэ къыдэкIырэ журнали 4-м: «Зэкъошныгъэм», «Жъогъобыным», «Литературная Адыгея» ыкIи «Родничок Адыгеи» зыфиIохэрэм яредактор шъхьа­Iэр тхакIоу МэщбэшIэ Исхьакъ.
Дзэукъожь Нуриет.