БлэкIыгъэ зыгъэпсэфыгъо мафэ­хэм республикэм щы­хъушIэгъэ жьыбгъэшхом къыздихьыгъэ гу­мэ­кIыгъохэм ядэгъэзыжьын Мые­къуапэ джыри щыдэлажьэх.

Шъугу къэдгъэкIыжьын, шэмбэт пчыхьэм такъикъ заулэм къыкIоцI къилъыгъэ жьыбгъэ лъэшым къалэм ичIыпIэ зэфэшъхьафхэм чъыгхэр ащырикIыкIыгъ, электричествэ рыкIуапIэхэр ащызэпичыгъэх. ЫкIуачIэ зыфэдагъэр сурэтхэм къау­шыхьаты. Ащ ыпкъ къикIэу унэгъуабэмэ нэфынэ ямыIэу гузэжъогъу хэтыгъэх. ГумэкIыгъом идэгъэзыжьын къалэм иэнергетикхэр псынкIэу ыуж ихьагъэх нахь мышIэми, ягъэцэкIэжьын охътэшIу ыхьыгъ: чэщым ыкIи ятIонэрэ мафэми бэмэ электричествэ яIагъэп. IофшIэнхэр зэрэкIорэм АР-м и ЛIышъхьэу КъумпIыл Мурат ежь ышъхьэкIэ гъунэ лъифыгъ ыкIи ителеграм-нэкIубгъо къызэрэщитыгъэмкIэ, хэкIодагъэ щыIэп.

А мафэм, бэдзэогъум и 6-м, Мыекъопэ ТЭЦ-м къызэриты­гъэмкIэ, Мыекъуапэ ипсэупIэу Западнэм, Кужорскэ зэпырыкIыпIэм дэжь, урамхэу Вере­щагиным, Пролетарскэм, Профсоюзнэм ыкIи Комсомольскэм ащызэбгырыщыгъэ электричествэ рыкIуапIэхэр жьыбгъэм ыцунтхъагъэх. Джащ фэ­дэу, ДНТэу «Коммунальник-2» зыфиIорэми нэфынэ яIагъэп. Пстэ­умкIи электричествэ ры­кIуапIэу 6 жьыбгъэм зэпичыгъ, трансформаторхэр къутагъэхэу гъогогъу 15 агъэунэфыгъ. А зэкIэри зыпкъ игъэуцожьыным ащ фэгъэзэгъэ къулыкъу­хэр мэфэ заулэм Iоф дашIагъ. Электричествэ рыкIуапIэхэр, зэбгырыщыпIэхэр агъэцэкIэ­жьыгъэх, чъыгэу жьыбгъэм риутыгъэхэр Iуащыжьыгъэх. Энергетикхэм яIофшIэн непи зэпыурэп. НэфынэмкIэ гумэ­кIы­гъохэр яIэхэу цIыфыбэ къафытео. Ощх макIэу къещхы­гъэми, фабэр зэкIакIорэп. Ащ къыхэкIэу жьыр зыгъэучъыIырэ псэуалъэ­хэр зэкIэми хагъанэх, зэфэ­хьысыжьыр — электричествэр афикъурэп.
Анцокъо Ирин.