Лэжьыгъэр зэкIэ аугъоижьынымкIэ мэкъумэщышIэхэм къафэнагъэр макIэ.

Шъугу къэдгъэкIыжьын, фышъхьэ лэжьыгъэхэмрэ рапсымрэ чIыгулэжьхэм аIожьы. Республикэм ахэр чIыгу гектар 108592-м мыгъэ ащашIагъэх. Мы пчъагъэм щыщэу рапсыр — гектар 8984-рэ, хьэр— 8251-рэ, коцыр — гектар 90961-рэ, третикалер – гектар 396-рэ. АР-м мэкъу-мэщымкIэ и Министерствэ къызэритырэмкIэ, непэрэ мафэм ехъулIэу лэжьыгъэ гектар 104446-р аIожьыгъах. Фышъхьэ лэжьыгъэхэмкIэ Адыгеим гектарым гурытымкIэ къырахыжьырэр центнер 49,9-рэ. БлэкIыгъэ илъэсым егъэпшагъэмэ, мыгъэрэ къэгъэлъэгъонхэр нахь иных. Гъатхэм щыIэгъэ огъур лэжьыгъэхэм мыгъэ ягоуагъэми, жъоныгъокIэ ощххэм Iофыр къызэтырагъэ­уцожьыгъ.
Шъхьафэу районхэм ягугъу пшIын зыхъукIэ, фышъхьэ лэжьыгъэхэу къа­хьыжьырэм ибагъэкIэ республикэмкIэ Кощхьэблэ районыр пэрыт. Ягъэбэжъу – гектарым центнер 54-рэ. Ащ къыкIэлъэкIох Шэуджэн районыр — центнер 52,1-рэ Джаджэр — центнер 52-рэ.
Ар епIолIэн плъэкIыщтэп рапсым. ГъэрекIорэ огъум ащ иягъэ къыригъэ­кIыгъ ыкIи мы илъэсымкIэ центнер 20,3-м ехъурэп зы гектарым къытырэр.
Ом изытет пэрыохъу афэмыхъумэ, мы тхьамафэм чIыгулэжьхэм Iоныгъор аухыщт. ПстэумкIи Iуахыжьынэу къэнагъэр гектар 4146-рэ.

Анцокъо Ирин.
Сурэтыр: Iэшъынэ Аслъан.