Адыгэ Республикэм и Правительствэ зычIэт унэм семинар-зэIукIэу «2025-рэ илъэсым нэс Урысые Федерацием икъэралыгъо лъэпкъ политикэ ипхырыщынкIэ Урысыем ишъолъырхэм ягъэцэкIэкIо хэбзэ къулыкъухэм пшъэрылъэу яIэхэм яхьылIагъ» зыфиIорэр тыгъуасэ щыкIуагъ.

УФ-м и Президент и Полномочнэ лIыкIоу Къыблэ фе­деральнэ шъолъырым щыIэм игуадзэу Владимир Гурба Iоф­тхьабзэр зэрищагъ.
ЗэIукIэм хэлэжьагъэх УФ-м и Президент хэгъэгу кIоцI политикэмкIэ и ГъэIорышIапIэ ипащэ игуадзэу Анатолий Вылегжаниныр, Адыгеим и ЛIы­шъхьэу КъумпIыл Мурат.
Джащ фэдэу зэIукIэм хэлэ­жьагъэх УФ-м и Президент и Администрацие, лъэпкъ Iоф­хэмкIэ Федеральнэ агентствэм, щынэгъончъэнымкIэ Федеральнэ къулыкъум АР-мкIэ и ГъэIорышIапIэ, АР-м ипрокуратурэ, и МВД яIофышIэхэр, министрэ­хэм я Кабинет хэтхэр, Урысыем и МИД и Дипломатическэ академие, УФ-м и Общественнэ палатэ, АКъУ-м, МКъТУ-м ялIыкIохэр, Краснодар краим, Ростов, Астрахань, Волгоград хэкухэм, Къырым, Севастополь, Къалмыкъым, ЛНР-м, ДНР-м, Запорожскэ, Херсон хэкухэм къарыкIыгъэхэр, республикэм имуниципалитетхэм япащэхэр.
УФ-м и Общественнэ палатэ хэтэу, тхакIоу, Урысыем Iоф­шIэнымкIэ и ЛIыхъужъэу Мэщ­бэшIэ Исхьакъ хьэкIэ лъапIэу Iофтхьабзэм хэлэжьагъ.
Владимир Гурба зэIукIэр къызэIуихи, УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым ыцIэкIэ шIуфэс къарихыгъ.
«Непэ тиеплъыкIэхэмкIэ ­тызэхъожьызэ, экспертхэм яеплъы­кIэхэри зэдгъашIэзэ, Iофхэм язытет джыри зэ уасэ фэтшIынэу сэгугъэ. Тызытегущы­Iэщт IофыгъохэмкIэ хэкIыпIэ зэфэшъхьафхэр ащ къытигъэлъэ­гъунэу, ищыкIэгъэ унашъохэм яштэнкIэ амалхэр къытынэу къысщэхъу», — къыIуагъ УФ-м и Президент и Полномочнэ лIыкIоу ЮФО-м щыIэм игуа­дзэ.
ЗэIукIэм хэлажьэхэрэм шIу­фэс къарихи, КъумпIыл Мурат агу къыгъэкIыжьыгъ лъэпкъ,
дин зэгурыIоныгъэм игъэпытэн те­гъэпсыхьэгъэ пшъэрылъхэу Урысыем игъэпытэнкIэ мэхьа­нэшхо зиIэхэу Президентэу Владимир Путиным къыгъэуцугъэхэр.
«Этнополитикэ Iофхэр зыпкъ итынхэ зэрэфаемкIэ Адыгеир щысэтехыпIэу щыт. Республикэм ис лъэпкъхэр зэкIэ Адыгеими, Урысыеми къарыкIощтым егъэ­гумэкIых, лъэпкъхэм азыфагу зыкIыныгъэу илъыр гъэпытэ­гъэн зэрэфаем дырагъаштэ, тиот­рас­лэ шъхьаIэхэм хэхъоныгъэ ягъэ­шIыгъэным яIахьышIу хашIыхьэ, хэушъхьафыкIыгъэ дзэ операци­ем хэлажьэхэрэм агу къаIэты», — къыIуагъ АР-м и ЛIышъхьэ.
Адыгеим щыпсэурэ лъэпкъ зэфэшъхьафхэм къахэкIыгъэхэр хэушъхьафыкIыгъэ дзэ операцием зэрэхэлажьэхэрэр, ахэм ащыщыбэм тын лъапIэхэр къа­зэ­рафагъэшъошагъэр респуб­ли­кэм ипащэ къыхигъэщыгъ. ­Лъэпкъ зэгурыIоныгъэр Адыгеим щы­гъэпытэгъэнымкIэ Iофтхьабзэу зэрахьэхэрэм, Урысыем икъэра­лыгъо лъэпкъ политикэ и Стратегие ипшъэрылъхэм ар зэрадиштэрэм ягугъу къы­шIыгъ.
Лъэпкъ зэфыщытыкIэхэмкIэ, дин объединениехэм зэдэлэжьэныгъэ адыряIэнымкIэ Советэу Адыгеим и ЛIышъхьэ дэжь щызэхэщагъэм, хэбзэухъумэкIо къулыкъухэу, лъэпкъ-культурэ организациехэм, дин объединениехэм япащэхэр зыхахьэрэм дэгъоу Iоф зэришIэрэр КъумпIыл Мурат къыхигъэщыгъ. Общественнэ организациехэм ялIыкIохэри терроризмэм пэуцужьыгъэнымкIэ Комиссием изэхэсыгъо къызэрэрагъэблагъэхэрэри ащ къыIуагъ.
УФ-м лъэпкъ IофхэмкIэ и Феде­ральнэ агентствэ IэпыIэгъу къафэхъузэ, Уры­сыем и Мафэ, лъэпкъхэм языкIыныгъэ и Мафэ, урыс культурэм и Мафэ, ­адыгэ культурэм и Мафэ игъэкIотыгъэу Адыгеим щыхагъэунэфыкIых. Ащ фэдэ Iофтхьабзэхэм ахэлажьэхэрэр нахьыбэ мэхъу зэпыт», — къыIуагъ КъумпIыл Мурат.
Дунэе Адыгэ Хасэр яIэпыIэгъоу адыгэ­хэу IэкIыб къэралхэм арысхэм зэпхыныгъэ зэрадыряIэм республикэм ипащэ шъхьафэу игугъу къышIыгъ. Республикэм щаштэгъэ къэралыгъо программэм диштэу зи Хэкужъ къэзыгъэзэжьхэрэм IэпыIэгъу арагъэгъоты. Дин, лъэпкъ зэ­гурымыIоныгъэхэр республикэм къы­щымыхъунхэмкIэ пэшIорыгъэшъ Iофтхьабзэу зэрахьэхэрэм, хэушъхьафыкIыгъэ дзэ операцием иветеранхэр ныбжьыкIэхэм зэрадэлажьэхэрэм, Херсон хэ­кумкIэ Геническэ районым исхэм, зы­шъхьэ къезыхьыжьэжьыгъэхэм IэпыIэгъу зэрафэхъухэрэм ар къатегущыIагъ.
УФ-м и Президент и Полномочнэ лIыкIоу ЮФО-м щыIэм игуадзэу Вла­димир Гурба къагъэуцугъэ пшъэрылъхэм язэшIохынкIэ Адыгеим опытышIу зэриIэр къыхигъэщыгъ.
Семинар-зэIукIэм Урысыем икъэралыгъо лъэпкъ политикэ ипхырыщынкIэ зигъо Iофыгъохэм щатегущыIагъэх, 2023-рэ илъэсымкIэ Iофэу ашIагъэр щызэфахьысыжьыгъ, 2024-рэ илъэсымкIэ пшъэрылъхэр щагъэнэфагъэх, IэкIыб къэ­ралыгъохэм къарыкIыгъэхэу Къыблэ федеральнэ шъолъырым щыпсэухэрэр социальнэ, культурэ лъэныкъомкIэ щы­Iэныгъэм хэгъэгъозэгъэнхэм япхыгъэ Iофыгъохэм щахэплъагъэх, лъэпкъ джэгъогъуныгъэ ныбжьыкIэхэм азыфагу къимытэджэнымкIэ амалэу зэрахьэхэрэм атегущыIагъэх. Шъолъырхэм ялIыкIо­хэм экстремизмэм пэуцужьыгъэнымкIэ, къулы­къухэм язэдэлэжьэныгъэ гъэпытэгъэнымкIэ, украинскэ национализмэмрэ неонацизмэмрэ ябэныжьыгъэнымкIэ, тарихъыр зытетым димыштэу къагъэлъэ­гъонэу зэрэпылъхэм пэуцужьыгъэнымкIэ IофшIагъэу яIэхэр къызэфаIотагъэх.
АР-м и ЛIышъхьэ ипресс-къулыкъу