Адыгэ къэралыгъо университетым иректорэу Мамый Даутэ Урысыем иректорхэм я Союз ипрезидент игуадзэу хадзыгъ.

Ректорхэм я Урысые Союз изэфэс Московскэ къэралыгъо университетэу М. В. Ломоносовым ыцIэ зыхьырэм щыкIуагъ. Ащ хэлэжьагъэхэм зэкIэмэ зэдырагъаштэу зичэзыу илъэситф пIалъэм телъытагъэу Урысыем ирек­тор­хэм я Союз ипрезидент IэнатIэр ыгъэцэкIэнэу Московскэ къэралы-
гъо университетым иректорэу, академикэу Виктор Садовничэр хадзыжьыгъ. Президентым игодзэ Iэ­натIэр къыфагъэшъошагъ Адыгэ къэралыгъо уни­верситетым иректорэу Ма­мый Даутэ.
Урысыем ит апшъэрэ еджапIэхэм яректорхэу ыкIи япрезидентхэу нэбгы­рэ 617-рэ зэфэсым хэлэ­жьагъ. Виктор Садовничэм зэфэсым къыщишIыгъэ псалъэм къыщиIотагъ къы­кIэлъыкIорэ илъэситфым союзым Iофэу ышIэщтыр, зыфэгъэзэгъэщтыр. Ректо­рым зэфэсым хэлажьэ­хэрэм агу къыгъэкIы­жьыгъ Урысыемрэ Белоруссиемрэ 2022-рэ илъэсым Болонскэ системэм къызэрэхэкIыжьыгъэхэр, ащ елъытыгъэу болонскэ Iа­хьэу университетхэм ягъэ­сэныгъэ системэ къыди­лъытэрэм зэхъокIыныгъэ­хэр зэрэфэхъущтхэр. Ап­шъэрэ гъэсэныгъэм и Урысые системэу непэ щыIэм аужырэ илъэс 20-м къэралыгъо гъэсэныгъэм нахь дэгъоу хэлъыгъэхэр къызэрэхихыщтхэр, шIэны­гъэ-технологическэ хэхъо­ныгъэ хэгъэгум егъэшIыгъэнымкIэ къэралыгъом ипащэу Владимир Путиным къыгъэнэфэгъэ унашъохэм ягъэцэкIэн зэрэ­дэлэжьэщтхэр Виктор Са­довничэм къыIуагъ. Ащ иIофшIэгъухэм анаIэ тыра­ригъэдзагъ УФ-м и Президент иунашъоу «Апшъэ­рэ гъэсэныгъэм исистемэ гъэкIэжьыгъэным фэгъэ­хьыгъэ упчIэхэр» зыфиIо­рэм елъытыгъэу пилотнэ проект зэратIупщыгъэм: 2023 — 2026-рэ илъэсхэм апшъэрэ еджэпIихыр апшъэрэ гъэсэныгъэм исистемакIэ зэрэтехьа­гъэ­хэр. Апэрэ зэфэхьысы­жьэу ахэм афэхъугъэхэм зэфэсым щатегущыIагъэх.
НэмыкI пшъэрылъэу агъэуцугъэхэм ащыщ гъэсэныгъэ лъапсэу щытхэм — анахьэу хьисапым, ин­формационнэ технологиехэм, искусственнэ акъы­лым, инженернэ гъэсэныгъэм — хэхъоныгъэхэр ягъэшIыгъэнхэм. Рек­торхэм я Союз ипрезидент къызэрэхигъэщыгъэмкIэ, Урысыем ишIэныгъэ-технологическэ суверенитет хьисапым ыкIи естественнэ-шIэныгъэ гъэсэныгъэм занкIэу епхыгъ. Ащ къэралыгъо мэхьанэ иIэу мэхъу. Шъугу къэдгъэ­кIы­жьын, Урысем иректорхэм я Союз гъэсэныгъэ организациехэм яректор 700-м ехъу хэт, УФ-м и Президент иунашъокIэ 1992-рэ илъэсым ар зэхащагъ. 1994-рэ илъэсым Московскэ къэралыгъо университетым иректорэу, академикэу Виктор Садовничэр Союзым иректорэу хадзы­гъагъ. Мы общественнэ организацием шIэныгъэ­-гъэсэныгъэ сообществэм ипащэхэм, апшъэрэ еджапIэхэм ястудентхэм яшIоигъоныгъэхэр къыреIо-
тыкIых.
Адыгэ къэралыгъо университетым ипресс-къулыкъу