Адыгеим щыпсэухэрэм афэгъэхьыгъ
Адыгэ къэралыгъо университетыр шъолъырым ичIыпIэ къэбар системэ изэхэгъэуцон дэлажьэ.
ШIэныгъэ ушэтынхэр шъолъырым зыкIыщырагъэкIокIыхэрэр тыкъэзыуцухьэрэ дунаир зыфэдэр ыкIи цIыфым ипсауныгъэ къэухъумэгъэным фытегъэпсыхьэгъэ шIыкIэхэр щыIэхэмэ гъэунэфыгъэныр ары. Стратегическэ проектэу «Адыгеир — псауныгъэм ишъолъыр» ыкIи программэу «Приоритет 2030-рэ» зыфиIохэрэм къадыхэлъытагъэу чIыпIэ къэбар системэр гъэпсыгъэщт, ащ шIэныгъэ ушэтынхэу ландшафтхэм яэкологие, инфраструктурэм, социальнэ фэIо-фашIэхэу псауныгъэм икъызэтегъэнэнкIэ агъэфедэхэрэр, Адыгеим щыпсэухэрэм ящыIэкIэ-псэукIэ изытетэу социологическэ уплъэкIунхэм къагъэлъэгъуагъэхэр щызэхэубытэгъэщтых.
Экологием ыкIи социальнэ лъэныкъохэм, ахэм хэхъоныгъэ ягъэшIыгъэным афэгъэхьыгъэ къэбар-шIэныгъэ лъапсэу щыIэм елъытыгъэу гъэIорышIэн Iофтхьабзэхэр Адыгэ къэралыгъо университетым ишIэныгъэлэжьхэм рахъухьэх, Московскэ къэралыгъо университетэу М. В. Ломоносовым ыцIэ зыхьырэм щылэжьэрэ яIофшIэгъухэр яIэпыIэгъух. ШIэныгъэ-гъэсэныгъэ концернэу «Вернандскэр — Адыгэ Республикэр» зыфиIорэм елъытыгъэу бгъуитIур зэдэлажьэ. Проектым ишIэныгъэ пащэр М. В. Ломоносовым ыцIэ зыхьырэ МКъУ-м чIыгум имелиорациерэ ифизикэрэкIэ икафедрэ ипащэу Аминат Умаровар ары.
Мэкъуогъум и 26-м къыщыублагъэу бэдзэогъум и 1-м нэс Мыекъопэ шъолъырым щыкIо-
гъэ шъоф экспедицием системэм пае къэбархэр специалист 45-мэ къаугъоигъэх. Ахэр метеорологых, зоологых, ботаникых, социологых.
— Апшъэрэ еджэпIэ зэфэшъхьафмэ яшIэныгъэлэжьхэу мы Iофтхьабзэм къыхэлажьэхэрэр лъэныкъуабэхэм афэгъэзагъэх. Тикупхэм шъхьаф-шъхьафэу биозэфэмыдэныгъэм, экологием, тыкъэзыуцухьэрэ дунаим, дендрологическэ ыкIи социологическэ лъэныкъохэм афэгъэхьыгъэ ушэтынхэр ашIыгъэх. Зы лъэныкъомкIэ, тэ чIыопсым изытет зэтэгъашIэ, адрэ лъэныкъомкIэ — социологхэм ауплъэкIу тыкъэзыуцухьэрэ дунаим цIыфхэм къаригъэлъэгъун ылъэкIыщтыр, — къыхигъэщыгъ Аминат Умаровам.
Проектым ипшъэрылъ шъхьаIэр — физкультурэм, спортым, рекреацием ыкIи псауныгъэм алъэныкъокIэ Адыгеим зэхэщэн Iофхэр Iэрыфэгъу ащыфэшIыгъэнхэр, цIыфхэм ягъашIэ хэгъэхъогъэныр, шъолъырым исхэм япсауныгъэ изытет къэзыгъэлъэгъорэ цифрэ паспортыр зэхэгъэуцогъэныр.
Апэрэ едзыгъом къызэрэдилъытэрэмкIэ, чIыпIэ къэбар системэр шъолъырым икъэлэ шъхьаIэу Мыекъуапэ пае агъэпсыщт, ащ къыкIэлъыкIощтых Адыгеим ит районхэри.
АкъУ-м
къытыгъэ къэбархэмкIэ
Дэрбэ Тимур.