ЩынэгъончъэнымкIэ Федеральнэ къулыкъум ишъолъыр ГъэIорышIапIэ Адыгэ Республикэм щыщ нэбгыритIоу Урысыем и Уголовнэ кодекс ия 322.1-рэ статья ия 2-рэ Iахь ипунктэу «а»-м зигугъу къышIырэ бзэ­джэ­шIагъэ зезыхьагъэкIэ зэгуцафэхэрэм уголовнэ Iоф къафызэIуихыгъ.

ГъэIорышIапIэм иIофышIэхэм зэрагъэунэфыгъэмкIэ, Гурыт Азием щыщ бзылъфыгъэу Моск­ва щыпсэурэм Урысые Федерацием исынымкIэ хэбзэ лъапсэ зиIэ тхылъым икъыдэ­хынкIэ IэпыIэгъу къызыфэхъухэкIэ ахъщэ зэраритыщтыр мы нэбгыритIумэ ариIуагъ.
Чъыгхэтэлэжьыным пылъ то­вариществэм икассир ахэр езэ­гъыгъэх IэкIыб къэралыгъом къикIыгъэ бзылъфыгъэр 2018-рэ илъэсым тыгъэгъазэм щегъэжьагъэу 2023-рэ илъэсым ищылэ мазэ нэс Мыекъуапэ щыпсэущтыгъэ фэдэу тхьэпэ нэпцI къа­ритынэу. Джащ фэдэу ахэм Мыекъуапэ щыщ нэбгырищмэ агурагъэIуагъ Урысыем и МВД къалэу МыекъуапэкIэ икъутамэ кощын IофхэмкIэ иотдел IэкIыб къэралым къикIыгъэ бзылъфыгъэр зыщыщым игъэунэфынкIэ Iофтхьабзэу зэхищагъэм хэлэ­жьагъэхэ фэдэу, бэшIагъэу ахэм а бзылъфыгъэр янэIуасэу къэбар нэпцIхэр араIонэу.
Урысыем и МВД икъутамэу Мыекъуапэ щыIэм кощын Iоф­хэмкIэ иотдел иIофышIэхэу агъэплъэхъугъэхэм бзылъфы­гъэр зыщыщыр зэрагъэунэфыгъэмкIэ зэфэхьысыжь ашIыгъ ыкIи ащ гражданствэ имыIэу алъытагъ. Нэужым ахэм унашъо аштагъ гражданствэ зимыIэу Урысые Федерацием исым иудостоверениерэ пIалъэ горэкIэ Урысые Федерацием щыпсэунэу Iизын тхылърэ бзылъфыгъэм къыратынхэу.
БзэджэшIагъэ зезыхьагъэхэм яуголовнэ Iофхэр зэхафыгъэх, зыр аубытыгъ, адрэр зыдэс къалэм дэкIын фимытэу ашIыгъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу