Адыгеим и ЛIышъхьэу КъумпIыл Мурат терроризмэм пэуцужьыгъэнымкIэ АР-м и Комиссиерэ АР-м и Оперативнэ штабрэ язимычэзыу зэхэсыгъо тыгъуасэ зэрищагъ

ХэушъхьафыкIыгъэ дзэ опе­рациер зыщыкIорэ лъэ­хъаным терактхэм цIыфхэр ащыухъумэгъэнхэмкIэ амалэу зэрахьэхэрэр гъэлъэшыгъэн зэрэфаем, кощын Iофыр щынэгъончъэным зэхэсыгъом щатегущыIагъэх.
Комиссием иIофшIэн хэлэ­жьагъэх АР-м и Къэралыгъо Совет — Хасэм и Тхьаматэу Владимир Нарожнэр, минист­рэхэм я Кабинет и Тхьаматэу КIэрэщэ Анзаур, АР-м ипрокуратурэ, и МВД, щынэгъончъэнымкIэ федеральнэ къулы­къум АР-мкIэ и ГъэIорышIапIэ, АР-м и МЧС, гъэсты­ныпхъэ-энергетическэ комплексхэу Адыгеим итхэм япсэуалъэхэм, уплъэкIокIо къулыкъухэм, муниципали­тетхэм япащэхэр.
Зэхэсыгъом зэрэщыхагъэу­нэфыкIыгъэмкIэ, джыдэдэм республикэм Iофхэр зыпкъ щитых, гумэкIыгъохэр щы­гъэзыегъэнхэмкIэ ищыкIэгъэ амалхэр щызэрахьэх. Гъэстыныпхъэ-энергетическэ комплексым ипсэуалъэхэр терактхэм ащыухъумэгъэнхэм епхыгъэ Iофыгъоми шъхьа­фэу мыщ щыхэплъа­гъэх. Псэуалъэхэмрэ къулыкъухэмрэ яIофышIэхэм мы лъэныкъомкIэ зэдырагъэштэнымкIэ пшъэрылъ гъэнэфагъэхэр афашIыгъэх.
Джащ фэдэу псэупIэ-коммунальнэ хъызмэтым ипсэуа­лъэхэу зэшъохэрэ псыр цIыф­хэм аIэкIэзыгъахьэхэрэм ящынэгъончъагъэ епхыгъэ Iофыгъохэм, ухъумэн Iофтхьабзэхэр зэрэзэхащэ­хэрэм, псэуалъэхэм япас­портхэм адиштэу амалхэр зэрэзэрахьэхэрэм зэхэсы­гъом щатегущыIагъэх. Кощын IофымкIэ гумэкIыгъоу къэуцу­хэрэр дэгъэзыжьыгъэнхэмкIэ, IэкIыб къэралхэм къарыкIырэ цIыфхэр социальнэ ыкIи культурнэ лъэ­ныкъохэмкIэ щыIэныгъэм хэгъэгъозэ­гъэнхэмкIэ зэрэзекIон фаехэми зэхэсыгъом къащыуцугъэх.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхэсыгъом къызэрэщиIуагъэмкIэ, лъэпкъ, дин зэфыщытыкIэхэр нахьышIу шIыгъэнхэм, экстремизмэм пэуцужьыгъэным, лъэпкъ джэгъогъуныгъэр дэгъэзыжьыгъэным атегъэпсыхьэгъэ Iофтхьэбзабэ илъэс къэс республикэм щызэрахьэ. Урысые Федерацием имиграционнэ хэбзэгъэуцугъэ зэхъокIыныгъэу фашIыхэрэм афэ­гъэхьыгъэ къэбархэр общественнэ, лъэпкъ, дин организациехэм ахэла­жьэхэрэм аIэкIагъахьэх. Мы Iофыгъо­хэмкIэ къэбар жъугъэм иамалхэм Iофышхо агъэцакIэ. Адыгэ Республикэмрэ Пшызэ шъолъыррэ ащыпсэурэ быс­лъымэнхэм я ДиндэлэжьапIэрэ Мые­къуапэрэ Адыгеимрэ яепархиерэ цIыф­хэм Iоф адашIэ, дин зэфэшъхьафхэр зылэжьхэрэр зэгурыIонхэ зэрэфаер ахэм араIо. НыбжьыкIэхэр, IэкIыб къэралхэм къарыкIыгъэ студентхэри ахэм зэра­хэтхэу, радикальнэ еплъыкIэхэм дамы­хьыхынхэмкIэ научнэ-практическэ кон­фе­ренциехэр ыкIи нэмыкI Iофтхьабзэ-
хэр гъэсэныгъэ языгъэгъотырэ организа­циехэм ащызэхащэх. IэкIыб къэралхэм къарыкIыжьыгъэ тилъэпкъэгъухэу тарихъ чIыгужъым къэзыгъэзэжьыгъэхэм Iоф ада­шIэ, урысые обществэм ахэр хэзэгъэнхэмкIэ IэпыIэгъу арагъэгъоты.
«Тикъулыкъухэр зэдырагъаштэу, пшъэ­рылъэу апашъхьэ итхэр къыдалъытэзэ, зэдэлэжьэнхэ фае. Сакъыныгъэ къызха­гъэфэным, терроризмэм пэуцужьырэ Комиссием иунашъохэм ягъэцэкIэн нахь лъэшэу акIуачIэ рахьылIэным мэхьанэшхо яI. Пащэ пэпчъ IофшIэнымкIэ нахь лъэшэу ынаIэ зытыригъэтын фэе лъэны­къохэр тэрэзэу къыхигъэщынхэ фае. Щынэгъончъагъэм нахь шъхьаIэ зи щыIэп!» — къыIуагъ КъумпIыл Мурат.
АР-м и ЛIышъхьэ ипресс-къулыкъу