Тикомандэхэр чаныгъэх
Адыгеим щыщ къэгъэнэжьэкIо ныбжьыкIэхэр Астрахань хэкум щыкIогъэ зэнэкъокъухэм къащыхэщыгъэх.
Адыгеим щыщ къэгъэнэжьэкIо ныбжьыкIэхэр Астрахань хэкум щыкIогъэ зэнэкъокъухэм къащыхэщыгъэх.
Къыблэ федеральнэ шъолъырым изэнэкъокъоу «Школа безопасности-2024» зыфиIорэр Наримановскэ районым щаухыгъ. АщкIэ гухэлъэу яIагъэр щынэгъончъэу зэрэзекIощтхэ, чIыпIэ зэжъум къикIыжьынхэ зэралъэкIыщт шIыкIэхэм ныбжьыкIэхэр афэгъэсэгъэнхэр, ахэм япсауныгъэ агъэпытэн зэрэфаер агурыгъэIогъэныр ары.
КIэлэцIыкIухэм гъэсэныгъэ тедзэ зыщарагъэгъотырэ республикэ гупчэм икоманди 2 Адыгеим ыцIэкIэ ащ хэлэжьагъ. Ахэм илъэс 12-м къыщегъэжьагъэу 16-м нэс аныбжьыгъ. Мэфи 5 кIогъэ зэнэкъокъухэм къэгъэнэжьын-лъыхъон Iофхэр кIэлэцIыкIухэм ащызэрахьагъэх, машIом игъэ-
кIосэжьын ыкIи нэмыкI Iофтхьабзэхэм ахэлэжьагъэх. Командэ пстэуми ухьазырыныгъэ дэгъу къызэрагъэлъэгъуагъэр осэшIхэм хагъэунэфыкIыгъ.
Адыгеим икъэгъэнэжьэкIо цIыкIухэм хагъэунэфыкIырэ чIыпIэхэр мыщ къыщахьыгъэх. УдыкIэко Азэматрэ Лариса Егоровамрэ агъэсэхэрэ, анахьыжъхэм якуп хэт Данил Каракян, Никита Литвиненкэм, Григорий Осадченкэм, Савелий Поповым, Максим Соломкиным, Анна Бажинам, Анастасия Комиссаренкэм, Маргарита Погодинам ятIонэрэ чIыпIэр къахьыгъ. Ахэм къатекIогъэ закъор Таганрог къикIыгъэ командэр ары.
АнахьыкIэхэм якуп ящэнэрэ чIыпIэр ыубытыгъ. Шэуджэн Алыйрэ Наталья Пахомовамрэ агъэсэхэрэ БжьэшIо Мурадин, Михаил Ефименкэм, Нэныжъ Бислъан, Матвей Оглоблиным, Александр Осадченкэм, Екатерина Ивановам, НэмытIэкъо Лаурэ, Валерия Скиба тыжьын медаль къафагъэшъошагъ.