Республикэм ипра­вительствэ и Унэ къолъхьэ тын-Iыхыным пэшIуекIогъэным епхыгъэ IофшIэным фэгъэзэгъэ Комис­сием изэхэсыгъо щы­кIуагъ. Адыгеим и ЛIышъхьэу КъумпIыл Мурат Iофтхьабзэр зэрищагъ.

Зэхэсыгъом хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, минист­рэхэм я Кабинет и Тхьаматэу КIэрэщэ Анзаур, АР-м и Прокуратурэ, АР-м и МВД, ФСБ-м Адыгэ РеспубликэмкIэ и ГъэIорышIапIэ, федеральнэ ыкIи республикэ къулы­къухэм яIэшъхьэтетхэр, муниципалитетхэм япащэхэр.
ЗэIукIэгъум хэлажьэхэрэр псауныгъэм икъэухъумэн ыкIи гъэсэныгъэм алъэныкъокIэ лъэпкъ проектхэм ягъэцэкIэн зыщыкIорэм къолъхьэ тын-­Iыхыным инэшанэхэр къахэмыфэнхэм иIофыгъохэм ате­гущыIагъэх. Джащ фэдэу Джэджэ ыкIи Кощхьэблэ районхэм чIыпIэ зыгъэIорышIэжьынымкIэ якъулыкъу­хэм къолъхьэ тын-Iыхыным пэшIуекIогъэнымкIэ Iофтхьабзэу зэрахьэхэрэм къащыуцугъэх.
Адыгеим псауныгъэм икъэу­хъумэнкIэ иминистрэу Мэрэтыкъо Рустем къыIуа­гъэм едэIугъэх зэхэсыгъом хэлажьэхэрэр. Медицинэ
ыкIи фармацевт IофшIэнымкIэ лицензиехэм, къэралыгъо щэ­фынхэм япхыгъэ Iофыгъо­хэм, медицинэм иорганизациехэм IэпэIэсэныгъэ зыхэлъ IофышIэхэр яIэнхэм ыкIи нэмыкIхэм ар къащыуцугъ.
Министрэм къызэрэхигъэщыгъэмкIэ, 2023-рэ илъэсым уплъэкIокIо-лъыплъэкIо къулыкъухэм уплъэкIун 15 зэхащэгъагъ. Лицензием епхыгъэ Iофтхьабзэхэр пэIудзыгъэ шIыкIэм тетэу минис­терствэм зэшIуехых, ащкIэ къэралыгъо, муниципальнэ фэIо-фашIэхэмкIэ портал зыкIыр къызфегъэфедэ.
Ащ къызэриIуагъэмкIэ, илъэсэу икIыгъэм пстэумкIи къащэфыгъэм сомэ миллион 3144,97-м ехъу тефагъ. Зэзэгъыныгъэу зэдашIыхэрэм ыкIи техникэм ылъэныкъокIэ медицинэ оборудованиеу къащэфырэм изытет игъом гъэунэфыгъэным анаIэ тырагъэты. Илъэсэу икIыгъэм мылъкум ипроцент 17,94-рэ а лъэныкъомкIэ кIаугъоен алъэкIыгъ. Республикэ проектэу «Пэублэ звеном игъэкIэжьын» зыфиIорэм тетэу медицинэ учреждениехэм яшIын, язэтегъэпсыхьан ыкIи ягъэцэкIэжьын зэрэкIорэм иуплъэ­кIун фагъэзагъ «Стройзаказчикыр».
2023-рэ илъэсым ипIалъэм гъэцэкIагъэ мыхъугъэ зэзэгъыныгъэхэм атегъэ­псыхьагъэу сомэ миллиони 115-м ехъу къыдэзылъытэрэ дэо тхылъ 18 АР-м псауныгъэм икъэухъумэнкIэ и Минис­терствэ медицинэм епхыгъэ пкъыгъохэр къаIэкIэзыгъэхьан фаеу щытыгъэхэм афигъэхьыгъ. Министрэм къызэрэхигъэ­щыгъэмкIэ, квотэ гъэнэфагъэм тетэу апшъэрэ медицинэ еджэпIэ зэфэшъхьафхэм студентхэр ащарагъаджэх «целевой шIыкIэм» тетэу. Министрэм къызэриIуагъэмкIэ, илъэсэу икIыгъэм специалитетым ипрограммэкIэ нэбгыри 127-рэ чIэхьагъ, ординатурэм — нэбгырэ 65-рэ, гурыт медицинэ гъэсэныгъэ зэрагъэгъотынэу — нэбгырэ 221-рэ. Къолъхьэ тын-Iыхын Iофым къыхэмыхьаным пае мы илъэсым жъоныгъуакIэм къыщегъэжьагъэу квотэу а лъэныкъомкIэ къыхагъэкIыгъэм фэгъэхьыгъэ къэбарэу АР-м псауныгъэм икъэухъумэнкIэ и Министерствэ къытыгъэр порталэу «Работа России» зыфиIорэм къыра­гъахьэ.
«Адыгеим медицинэ IофышIэхэр фи­къухэрэп. Студент-целевикхэр къэра­лыгъо ушэтын зыкIымкIэ анахь баллы­шхо къэзыхьыгъэхэм къахэкIынхэм ты­наIэ нахь тедгъэтын фае. Еджэныр къызаухыкIэ республикэм ыпашъхьэкIэ пшъэрылъэу яIэхэр зэрифэшъуашэу ахэм къагъэшъыпкъэжьынхэ фае», — къы­Iуагъ КъумпIыл Мурат.
Нэужым къэгущыIагъ АР-м гъэсэныгъэмрэ шIэныгъэмрэкIэ иминистрэу Евгений Лебедевыр. Ащ къызэрэхигъэщыгъэмкIэ, анахьыбэу хэукъоныгъэхэр зыщашIыхэрэр къэралыгъо щэфынхэр ары. Ащ дакIоу зэзэгъыныгъэм къыди­лъытэрэ шапхъэхэм атемыгъэпсыхьэгъэ товархэр къаIэкIахьэхэ зыхъукIэ, нахь сакъыныгъэ къызхагъэфэн фае.
Министрэм къызэрэхигъэщыгъэмкIэ, зэзэгъыныгъэм тетэу къащэфырэ товархэр уплъэкIугъэнхэм пае эксперт комиссие зэхащагъ. Илъэсэу икIыгъэм сомэ миллион 259,212-рэ зытефэщт зэзэгъыныгъэ 48-рэ зэдашIыгъ. Товархэр игъом къызэраIэкIамыгъэхьагъэхэм пае сомэ миллионым ехъу къыдэзылъытэрэ дэо тхыгъэ 32-рэ аIэкIагъэхьагъ. Мэзищ тешIэ къэс къэралыгъо системэу «Электрон бюджетыр» зыфиIорэм бюджет мылъкур зыпэIуагъэхьагъэмкIэ отчет къырагъахьэ. Лъэпкъ проектэу «Гъэсэныгъэр» гъэцэкIагъэ зэрэхъурэм иуплъэ­кIун ны-тыхэм яштаб фэгъэзагъ. Грантхэр ятыгъэнхэм ылъэныкъокIэ шэпхъэ-­правовой актхэр аухэсыхэ зыхъукIэ, къулыкъу экспертизэр къызфагъэфедэ, прокуратурэр хэлажьэзэ къолъхьэ тын-­Iыхыным инэшанэхэр къахэмыфэнхэмкIэ ищыкIэгъэ лъэныкъохэр зэкIэ агъэу­нэфых.
Адыгеим и ЛIышъхьэ анахьэу анаIэ зытыраригъэдзагъэхэм ащыщ зэзэгъыныгъэхэр адашIыхэ, товарэу къафащагъэхэр къызIэкIагъахьэхэ зыхъукIэ хэу­къоныгъэхэр хамышIыхьанхэр ары, сыда пIомэ товархэмрэ фэIо-фашIэхэмрэ къаIэкIэзыгъахьэхэрэм къахэкIых узгъэ­плъэхъун зылъэкIыщтхэр.
«Гъэсэныгъэм ылъэныкъокIэ Iофы­гъохэм татегущыIэ зыхъукIэ, анахьэу тынаIэ зытедгъэтын фаер кIэлэцIыкIу­хэу еджапIэхэм ачIэсхэм ягъэшхэн ары. Планым къыдимылъытэрэ уплъэкIунхэр нахьыбэ шIыгъэнхэм мэхьэнэ гъэнэфагъэ иI. Ащ нэмыкIэу муниципалитетхэр хэлажьэхэзэ еджапIэхэм ягъэшхэпIэ анахь дэгъухэр къыхэгъэщыгъэнхэ, анахь пщэрыхьэкIо дэгъухэр кIэгъэгушIугъэнхэ фае», — къыIуагъ КъумпIыл Мурат.
ИкIэухым чIыпIэ зыгъэIорышIэжьыным икъулыкъухэм къолъхьэ тын-Iыхыным пэшIуекIогъэнымкIэ яIофхэм язытет тегущыIагъэх. Джэджэ районым ипащэу Андрей Таранухинымрэ Кощхьэблэ районым ипащэу Хьамырзэ Зауррэ отчет къашIыгъ.
Муниципальнэ образованиехэм япащэхэм игъо афалъэгъугъ муниципальнэ къулыкъушIэхэм хахъоу яIэхэмрэ ямылъкурэ афэгъэхьыгъэ къэбарэу къаIэкIа­хьэрэр нахь тэрэзэу зэхафызэ ашIынэу, якъулыкъу пшъэрылъхэр зэрагъэца­кIэ­хэрэр нафэ хъуным ыкIи къолъхьэ тын-­Iыхыным пэшIуекIорэ хэбзэгъэуцугъэу щыIэм къыдилъытэрэ шапхъэхэр мыу­къогъэнхэм пае.
АР-м и ЛIышъхьэ ипресс-къулыкъу