Тиреспубликэ ынаIэ зытыригъэтырэ Геническэ районым кIэлэцIыкIу учреждениеу итхэр еджэгъу илъэсыкIэм ехъулIэу зэтырагъэпсыхьажьых.

Херсон хэкум и Геническэ район къикIыгъэ сабыйхэм джырэ уахътэм Адыгеим зы­щагъэпсэфы.
«Херсон хэкум и Геническэ район къикIыгъэ кIэлэцIыкIухэм тиреспубликэ илагерьхэм защагъэпсэфызэ тихабзэ, тикультурэ агу етыгъэу нэIуасэ защыфашIы. Тэ а уахътэм еджэгъу илъэсыкIэм пстэури фэтэгъэ­хьазыры», — къащитхыгъ исо­циальнэ нэ­кIубгъохэм Адыгеим и ЛIышъхьэ.
Геническэ муниципальнэ шъо­лъырым хэхьэрэ Азовскэ еджапIэм игъэфэбэн системэ тиреспубликэ икIыгъэхэм гъэцэ­кIэжьынхэр щашIыгъахэх. КIэлэцIыкIу IыгъыпIэу «Теремок» зыфиIорэм щагъэ­шхэнхэм те­гъэ­псыхьэгъэ ичIыпIэ хэхыгъэ иинженер псэуалъэхэм гъэцэ­кIэжьын куухэр арашIылIагъэх, Геническ иеджэпIэ-интернат зыщагъашхэхэрэ чIыпIэр, мы псэупIэм я 2-рэ еджапIэу дэтым идэкIояпIэхэмрэ исанитарнэ псэуалъэхэмрэ агъэкIэ­жьыгъэх.
Джырэ уахътэм псэупIэу Чон­гар кIэлэцIыкIу IыгъыпIэу дэтым игъэфэбэпIэ системэ агъэцэ­кIэжьы. Джащ фэдэу физкультурэ-зэтегъэуцожьын комплекситIу ыкIи Геническэ районым и Новоалексеевскэ еджапIэу

N 2-мрэ Новотроицкэ районым и Чкаловскэ еджапIэрэ спорт площадкитIу ащашIы.
«IофшIэнхэм афэгъэнэфэгъэ пIалъэхэм атекIыхэрэп. Мы илъэ­сым рахъухьэгъэ объектхэр зытелъытэгъэ уахътэм ехъулIэу аухыщтых. IэпыIэгъур къызэтедгъэуцощтэп. Ащ дакIоу Херсон хэкум ипащэхэм тырягъусэу зэ­тэгъашIэ тызылъыплъэрэ районыр анахьэу зыфэныкъомрэ ащ изэтегъэуцожьынрэ хэ­хъоны­гъэ ашIынымкIэ апэрап­шIэу щыт пшъэрылъхэр, 2024 — 2028-рэ илъэсхэм зэшIотхыщтхэр итэхъухьэ», — къащитхыгъ исоциальнэ нэкIубгъохэм КъумпIыл Мурат.