ООН-м зэригъэнэфагъэм тетэу 2022-рэ илъэсым къыщегъэжьагъэу 2032-рэ илъэсым нэс къыдэфэрэ илъэси 10-р ижъырэ лъэпкъыбзэхэм якъэухъумэн иIофыгъохэм лъэныкъо пстэумкIи зыщатегущыIэщтхэ, зэшIохыкIэ амалэу ащкIэ щыIэхэр куоу зыщагъэунэфыщтхэ дунэе мэхьанэ зиIэ чэзыоу щытыщт.

2022-рэ илъэсым а Iофым епхыгъэ дунэе конференциеу щыIагъэм цIэу иIагъэр «Ныдэлъфыбзэхэм я Дунэе хъарзынэщ: къэухъумэгъэнхэр ыкIи хэхъоныгъэ афэшIыгъэныр». А Iофтхьабзэр зэхэзыщэгъагъэхэм ащыщ лъэпкъ IофхэмкIэ Федеральнэ агентствэр.
Мы мафэхэм я II-рэ Дунэе конференциеу Санкт-Петербург щыкIорэм хэлэжьэнхэу Таврическэ Унэшхом рагъэблэгъагъэх дунаим ихэгъэгу ­20-мэ ялIыкIуи 150-р. Адыгэ Республикэм илIыкIохэри ащ хэлажьэх.
Дунэе конференцием шIуфэс псалъэ къыщишIыгъ Урысыем и Федеральнэ агентствэ ипащэу Игорь Бариновым.
ЗэIукIэшхом рагъэблэгъагъэхэм ащыщэу Адыгеим ыцIэкIэ гущыIэр къэзышIыгъэр шIэныгъэхэмкIэ ГУАРИ-м ипащэ игуадзэу Биданэкъо Марзет. НыбжьыкIэ этнолагерэу «Адыгэ хабз» зыфиIорэм адыгабзэм икъызэтегъэнэнкIэ ыкIи ихэгъэхъонкIэ шIуагъэу къытырэм фэгъэхьыгъагъ ащ ипсалъэ.